BC హాస్టళ్ల అభివృద్ధికి దాతల సహకారం తీసుకుంటాం: మంత్రి సవిత

ఆంధ్రప్రదేశ్ రాష్ట్రంలోని బీసీ హాస్టళ్లను సమగ్రంగా అభివృద్ధి చేయడమే లక్ష్యంగా ప్రభుత్వం కొత్త ప్రణాళికను రూపొందించింది. పీ4 మోడల్ కింద ఈ హాస్టళ్లను అభివృద్ధి చేసేందుకు చర్యలు చేపట్టనున్నట్లు బీసీ సంక్షేమ శాఖ మంత్రి సవిత తెలిపారు. హాస్టళ్లకు అవసరమైన మౌలిక సదుపాయాలను కల్పించేందుకు ప్రభుత్వంతోపాటు సమాజంలోని దాతల సహకారాన్ని కూడా తీసుకోనున్నట్టు పేర్కొన్నారు. ముఖ్యంగా ఎన్టీఆర్ విదేశీ విద్య పథకం ద్వారా లబ్ధి పొందిన విద్యార్థులు ప్రస్తుతం ఉన్నతస్థానాల్లో ఉన్నారని తెలిపారు. అలాంటి వారు ఇప్పుడు సమాజానికి తిరిగి సాయంగా నిలవాలన్నారు.

2016 నుంచి 2019 మధ్యకాలంలో విదేశీ విద్య పథకం ద్వారా శిక్షణ పొందిన ఎందరో విద్యార్థులు ఐఏఎస్, ఐపీఎస్, అంతర్జాతీయ సంస్థలలో ఉన్నత ఉద్యోగాల్లో ఉన్నట్లు మంత్రి వెల్లడించారు. అటువంటి వారు ఇప్పుడు బీసీ హాస్టళ్ల అభివృద్ధిలో భాగస్వాములవ్వాలని కోరారు. విద్యా ప్రగతిలో ప్రభుత్వ మద్దతుతో ఎదిగిన వారు తమ తరగతుల అభివృద్ధికి కృషి చేయాలని ఆమె సూచించారు. ఈ కార్యక్రమం ద్వారా వెనుకబడిన తరగతుల విద్యార్థులకు మంచి వసతులు, ఉత్తమ వాతావరణం కల్పించి, వారి భవిష్యత్తును మెరుగుపరచాలన్నదే ప్రభుత్వ లక్ష్యమని మంత్రి తెలిపారు.