Balakrishna Akhanda 2: అఖండ 2.. బాలయ్యకి కళ్లుచెదిరే రెమ్యూనరేషన్..

నందమూరి బాలకృష్ణ హీరోగా ప్రస్తుతం బాబీ దర్శకత్వంలో ఒక సినిమాను చేస్తున్న విషయం తెల్సిందే. ఆ సినిమా తర్వాత బోయపాటి శ్రీను దర్శకత్వంలో అఖండ 2 ను బాలయ్య చేసేందుకు ఓకే చెప్పారు. ఇప్పటికే వీరి కాంబోలో వచ్చిన మూడు సినిమాలు సూపర్‌ హిట్ అయిన నేపథ్యంలో అఖండ 2 పై అంచనాలు భారీగా ఉన్నాయి. బ్యాక్ టు బ్యాక్‌ సక్సెస్ లను సొంతం చేసుకుంటున్న బాలయ్య తన పారితోషికంను భారీగా పెంచారు.

బాలకృష్ణ ఈ మధ్య కాలంలో వరుస సినిమాలను చేస్తూ హిట్స్ కొడుతూ దూసుకు పోతున్నారు. అఖండ, వీరి సింహారెడ్డి, భగవంత్ కేసరి సినిమాలతో సక్సెస్ లను అందుకున్నారు. ప్రస్తుతం బాబీ దర్శకత్వంలో ఒక సినిమాను చేస్తున్నారు. ఆ సినిమా వచ్చే ఏడాది సంక్రాంతికి ప్రేక్షకుల ముందుకు రాబోతుంది. ఈ దసరా సందర్భంగా బాబీ సినిమా టైటిల్‌ ను ప్రకటించే అవకాశాలు ఉన్నాయని తెలుస్తోంది. బాలయ్య ప్రస్తుత సినిమా షూటింగ్‌ పూర్తి అయిన వెంటనే అఖండ 2 సినిమాను పట్టాలెక్కించేందుకు బోయపాటి ప్లాన్‌ చేస్తున్నారు. ఇప్పటికే స్క్రిప్ట్‌ వర్క్ దాదాపుగా పూర్తి అయిందని, బాలయ్య లుక్ టెస్ట్‌ జరుగుతుందని తెలుస్తోంది.

అతి త్వరలోనే షూటింగ్ ప్రారంభం కాబోతున్నట్లుగా అఖండ 2 మేకర్స్ చెబుతున్నారు. ఈ సమయంలో బాలయ్య అఖండ 2 కోసం తీసుకోబోతున్న పారితోషికం గురించి ఆసక్తికర చర్చ జరుగుతోంది. అఖండ 2 కోసం బాలకృష్ణ గతంలో ఎప్పుడు లేనంతగా రూ.30 కోట్ల పారితోషికంను అందుకోబోతున్నట్లుగా తెలుస్తోంది. భగవంత్ కేసరి సినిమాతో పాటు ప్రస్తుతం బాబీ దర్శకత్వంలో రూపొందుతున్న సినిమాకు గాను పాతిక కోట్ల లోపు పారితోషికంను అందుకున్నారట. ఇప్పుడు అఖండ 2 కోసం రూ.30 కోట్లు పారితోషికంగా అందుకోబోతున్నారు. రవితేజ, నాని లు ఇప్పటికే రూ.30 కోట్లు పారితోషికం అందుకుంటున్నారు. వారితో పాటు ఇప్పుడు బాలయ్య రూ.30 కోట్ల పారితోషికంను అందుకుంటున్నారు.

నిర్మాతలను డిమాండ్‌ చేయకుండా, వారు ఇచ్చిన మొత్తంను తీసుకుంటూ సినిమాలు చేసే బాలకృష్ణ ఇప్పుడు మాత్రం రూ.30 కోట్ల పారితోషికం అందుకోబోతున్నారు. అదీ నిర్మాతలు కావాలని పెంచిన మొత్తంగా సమాచారం అందుతోంది.