రోడ్డుపై దొరికిన ఏటీఎం కార్డు… అదృష్టం అనుకున్న మహిళకు షాక్!

రోడ్డుపై నడుస్తూ వెళ్తున్న ఓ మహిళకు ఏటీఎం కార్డుతో పాటు పిన్ నంబర్ రాసి ఉన్న పేపర్ కనిపించడం ఆమె జీవితాన్ని పూర్తిగా మార్చేసింది. అనుకోకుండా దొరికిన ఈ కార్డుతో వెంటనే ఏటీఎం కేంద్రానికి వెళ్లి రూ.50,000 విత్‌డ్రా చేసింది. ఆ మొత్తంలో కొంత భాగంతో బంగారు కమ్మలు కూడా కొనుగోలు చేసింది. అయితే తాను చేసిన పని పెద్ద తప్పు అని ఆమెకు తెలుసుకాని, పోలీసుల దర్యాప్తుతో నిజం వెలుగులోకి రావడంతో సమస్యల్లో చిక్కుకుంది. ఈ విచిత్ర ఘటన తమిళనాడులోని వేలూరులో చోటుచేసుకుంది. చిత్తూరు జిల్లా గుడిపాల ప్రాంతానికి చెందిన ఇన్బకుమారి అనే మహిళ, తన కుమార్తెతో కలిసి కళ్లద్దాలు కొనుగోలు చేసే పనిలో భాగంగా వేలూరు వెళ్లింది. ఆధార్ జిరాక్స్ తీసుకురమ్మని కోరడంతో సమీపంలోని షాపుకు వెళ్లే సమయంలో, ఆమె బ్యాగులో ఉన్న ఏటీఎం కార్డు, అలాగే పిన్ నంబర్ ఉన్న స్లిప్ రోడ్డుపై పడిపోయాయి. ఈ విషయాన్ని ఆమె గ్రహించేలోపే, దాన్ని దొరికించిన మరో మహిళ ఏటీఎం సెంటర్‌కు వెళ్లి డబ్బులు డ్రా చేసింది. ఇన్బకుమారి మొబైల్‌కు అకస్మాత్తుగా విత్‌డ్రా మెసేజ్ రావడంతో, ఏటీఎం కార్డు తప్పిపోయిందని గుర్తించి వెంటనే పోలీసులకు ఫిర్యాదు చేసింది. కేసు నమోదు చేసిన పోలీసులు లావాదేవీలు జరిగిన ఏటీఎం కేంద్రాలను చెక్ చేసి, సీసీ కెమెరాల ఆధారంగా రాజపాళ్యానికి చెందిన దేవి అనే మహిళ డబ్బులు డ్రా చేసినట్లు గుర్తించారు. ఆమెను అదుపులోకి తీసుకుని విచారించగా, రోడ్డుపై దొరికిన కార్డుతో డబ్బులు తీసుకున్నట్లు ఒప్పుకుంది. దేవి విత్‌డ్రా చేసిన రూ.50,000లో కొంతతో బంగారు కమ్మలు కొనుగోలు చేసినట్లు చెప్పింది. పోలీసులు నగలు మరియు రూ.20,000 నగదు స్వాధీనం చేసి, ఆమెను అరెస్ట్ చేశారు. కోర్టులో హాజరుచేసిన అనంతరం ఆమెను రిమాండ్‌కు తరలించారు. ఈ ఘటన ఇతరులకు హెచ్చరికగా మారింది — దొరికిన కార్డు వాడటం నేరమని, వెంటనే పోలీసులకు అప్పగించడం మాత్రమే సరైన మార్గమని పోలీసులు సూచిస్తున్నారు.