గద్దర్ అవార్డుల ఎంపిక పారదర్శకంగా – 2014-2023 సినిమాలకూ త్వరలో ప్రకటన

తెలంగాణ ప్రభుత్వం అందించే ప్రతిష్ఠాత్మక “గద్దర్ సినిమా అవార్డులు” తాజాగా ప్రకటించగా, అవార్డు ఎంపికలు పూర్తిగా పారదర్శకంగా జరిగాయని జ్యూరీ ఛైర్‌పర్సన్ జయసుధ వెల్లడించారు. ఈ అవార్డులు నటీనటులకు, సినీ సాంకేతిక నిపుణులకు కొత్త ఉత్తేజాన్ని ఇస్తాయని ఆమె పేర్కొన్నారు.

ఇక గద్దర్ అవార్డులు ప్రస్తుతం విడుదలైన సినిమాలకే కాకుండా, గత దశాబ్ద కాలంలో విడుదలైన సినిమాలకు కూడా వర్తించనున్నట్లు తెలంగాణ ఫిలిం డెవలప్మెంట్ కార్పొరేషన్ ఛైర్మన్ దిల్ రాజు వెల్లడించారు. ఆయన మాట్లాడుతూ, 2014 నుంచి 2023 మధ్యకాలంలో విడుదలైన చిత్రాలకు గద్దర్ అవార్డులను మరో ఒక్కరోజు లేదా రెండు రోజుల్లో ప్రకటించనున్నట్లు స్పష్టం చేశారు.

ఇటీవలే 2024 సంవత్సరానికి గద్దర్ అవార్డుల జాబితా విడుదలై మంచి స్పందన పొందిన విషయం తెలిసిందే. ఇందులో అల్లు అర్జున్ (పుష్ప-2) ఉత్తమ నటుడిగా, నాగ్ అశ్విన్ (కల్కి) ఉత్తమ దర్శకుడిగా అవార్డులు గెలుచుకున్నారు.

అవార్డుల ఎంపిక పద్ధతులు, ప్రమాణాలు పూర్తిగా జ్యూరీ ఆధ్వర్యంలో, రాజకీయ దురుద్దేశాలు లేకుండా చేపట్టబడినట్లు అధికార వర్గాలు తెలిపారు. గద్దర్ వంటి ప్రజాకవి పేరుతో అవార్డులను ఇవ్వడం, సామాజిక స్పృహతో కూడిన సినిమాలకు ప్రాధాన్యత ఇవ్వడం తెలంగాణ ఫిల్మ్ రంగానికి గౌరవ విషయంగా మారిందని పరిశ్రమ ప్రముఖులు అభిప్రాయపడుతున్నారు.

తొలిసారిగా రాష్ట్ర ప్రభుత్వం ఈ స్థాయిలో సినిమా అవార్డులను ప్రకటించడాన్ని సినీ వర్గాలు స్వాగతించాయి. గతానికి గౌరవం, ప్రస్తుతం ప్రోత్సాహం, భవిష్యత్‌కు మార్గదర్శనం కావాలనే దృష్టితో ఈ కార్యక్రమాన్ని విస్తృతంగా అభివృద్ధి చేస్తున్నట్లు సినీ అభివృద్ధి సంస్థ అధికారులు తెలిపారు.