అజారుద్దీన్‌కు 2 శాఖలు కేటాయించిన తెలంగాణ సర్కార్ – మైనార్టీ సంక్షేమం, పబ్లిక్ ఎంటర్‌ప్రైజెస్ బాధ్యతలు

మాజీ భారత క్రికెటర్, కాంగ్రెస్ నాయకుడు మహ్మద్ అజారుద్దీన్ ఇటీవలే తెలంగాణ మంత్రివర్గంలో చోటు దక్కించుకున్నారు. అక్టోబర్ 31న రాజ్‌భవన్‌లో గవర్నర్ జిష్ణు దేవ్ వర్మ సమక్షంలో ఆయన మంత్రిగా ప్రమాణ స్వీకారం చేశారు. తాజాగా తెలంగాణ ప్రభుత్వం ఆయనకు రెండు కీలక శాఖలను కేటాయించింది. అజారుద్దీన్‌కు మైనార్టీ సంక్షేమం, పబ్లిక్ ఎంటర్‌ప్రైజెస్ వంటి శాఖలను అప్పగిస్తూ ఉత్తర్వులు విడుదల చేసింది.

రేవంత్ రెడ్డి ప్రభుత్వం మంత్రివర్గ విస్తరణలో భాగంగా అజారుద్దీన్‌ను క్యాబినెట్‌లోకి తీసుకుంది. ఎమ్మెల్సీ పదవికి గవర్నర్ ఆమోదం ఇంకా లభించకపోయినా, కాంగ్రెస్ హైకమాండ్ ఆయనకు మంత్రి బాధ్యతలు అప్పగించాలని నిర్ణయించింది. ఈ నియామకం తెలంగాణలో రాబోయే జూబ్లీహిల్స్ ఉప ఎన్నికల ముందు తీసుకున్న వ్యూహాత్మక నిర్ణయంగా భావిస్తున్నారు.

తెలంగాణ కేబినెట్‌లో ప్రస్తుతం 15 మంది మంత్రులు ఉన్నారు. కాంగ్రెస్ పార్టీకి చెందిన ముస్లిం మైనార్టీ వర్గానికి ప్రాతినిధ్యం కల్పించేందుకు అజారుద్దీన్‌కు మంత్రి పదవి ఇవ్వడం హైకమాండ్ తీసుకున్న ముఖ్య నిర్ణయంగా చెప్పవచ్చు. గతంలో కాంగ్రెస్ పాలనలో ఎప్పుడూ ముస్లిం మైనార్టీకి ఒక మంత్రి పదవి ఉండేది.

2023 అసెంబ్లీ ఎన్నికల్లో అజారుద్దీన్ జూబ్లీహిల్స్‌ నియోజకవర్గం నుంచి పోటీ చేసి ఓటమి పాలయ్యారు. తాజాగా జరగబోయే ఉపఎన్నికల్లోనూ ఆయన పేరు వినిపించినా, చివరికి కాంగ్రెస్ హైకమాండ్ నవీన్ యాదవ్‌కు ఆ సీటు కేటాయించింది. అయినా, అజారుద్దీన్‌కు మంత్రి పదవి ఇవ్వడం ద్వారా పార్టీ మైనార్టీ వర్గానికి ప్రాతినిధ్యం కల్పించినట్టయింది.