Telangana
కేటీఆర్ భరోసా – పద్మశ్రీ దర్శనం మొగులయ్యకు చికిత్స, భూమి సమస్య పరిష్కారం హామీ
తెలంగాణ జానపద కళాకారుడు, పద్మశ్రీ అవార్డు గ్రహీత దర్శనం మొగులయ్యకు బీఆర్ఎస్ వర్కింగ్ ప్రెసిడెంట్ కేటీఆర్ పెద్ద భరోసా ఇచ్చారు. మొగులయ్యను ఆయన హైదరాబాద్‌లోని తన నివాసంలో కలుసుకుని ఆరోగ్యం, కుటుంబ పరిస్థితులను అడిగి తెలుసుకున్నారు. మొగులయ్య ఎదుర్కొంటున్న ఇబ్బందులు విని వెంటనే స్పందించిన కేటీఆర్, పూర్తి సహాయం అందిస్తానని హామీ ఇచ్చారు.
మొగులయ్య తన కంటి చూపు మందగించి చికిత్స కోసం ఇబ్బందులు పడుతున్న విషయాన్ని కేటీఆర్ దృష్టికి తీసుకువచ్చారు. దీనిపై కేటీఆర్ వెంటనే స్పందించి, హైదరాబాద్‌లోని ఎల్వీ ప్రసాద్ ఐ హాస్పిటల్‌లో పూర్తి చికిత్సను తానే భరించుతానని హామీ ఇచ్చారు. ఆయనకు అత్యుత్తమ వైద్య సేవలు అందేలా చర్యలు తీసుకోవాలని సంబంధిత అధికారులకు సూచించారు.
తర్వాత మొగులయ్య గతంలో హయత్ నగర్ మండలంలో కేటాయించిన 600 గజాల భూమిపై కొంతమంది వ్యక్తులు కోర్టు కేసులు వేసి ఇబ్బందులు కలిగిస్తున్నారని వివరించారు. దీనిపై కేటీఆర్ వెంటనే రంగారెడ్డి జిల్లా కలెక్టర్ నారాయణరెడ్డికి ఫోన్ చేసి సమస్యను పరిష్కరించాలని ఆదేశించారు. మొగులయ్యకు ఆ స్థలంపై పూర్తి రక్షణ కల్పించాలని, అవసరమైతే న్యాయపరమైన సహాయం అందించమని కూడా భరోసా ఇచ్చారు.
ఈ సందర్భంగా మొగులయ్య మాట్లాడుతూ, తాను అడవుల్లో కిన్నెర వాయించే కళాకారుడిగా ఉన్న సమయంలో తనను గుర్తించిన వ్యక్తి సీఎం కేసీఆర్ అని చెప్పారు. ఆయన సహకారం వలనే తన కళ ప్రపంచం దృష్టికి చేరిందని, పద్మశ్రీ అవార్డు పొందే స్థాయికి ఎదిగానని తెలిపారు. కేసీఆర్ చేసిన సహాయానికి, కుటుంబానికి ఇచ్చిన మద్దతుకు ఎల్లప్పుడూ రుణపడి ఉంటానని తెలిపారు. తన భూమి వివాదాన్ని పరిష్కరించడంలో కేటీఆర్ తీసుకున్న చర్యలకు కృతజ్ఞతలు తెలిపారు.
