పత్తి రైతులకు గుడ్ న్యూస్.. ఏపీ ప్రభుత్వం కీలక నిర్ణయం తీసుకుంది

ఆంధ్రప్రదేశ్ పత్తి రైతులకు ప్రభుత్వం మంచి వార్త అందించింది. రేపటి నుంచే (బుధవారం) రాష్ట్రవ్యాప్తంగా పత్తి సేకరణ ప్రారంభమవనుంది. ఈ ప్రక్రియలో భాగంగా 30 పత్తి కొనుగోలు కేంద్రాలు ఏర్పాటు చేయనున్నట్లు వ్యవసాయశాఖ మంత్రి అచ్చెన్నాయుడు ప్రకటించారు. రైతులు ఇకపై తమ పత్తిని కనీస మద్దతు ధర రూ.8,110కి అమ్ముకునే అవకాశం ఉంది. ప్రభుత్వం పత్తి కొనుగోలు ప్రక్రియను పారదర్శకంగా నిర్వహించేందుకు తగిన ఏర్పాట్లు చేసినట్లు తెలిపారు.

ప్రభుత్వం తెలిపిన వివరాల ప్రకారం, ఈ సంవత్సరం రాష్ట్రవ్యాప్తంగా 4.56 లక్షల హెక్టార్లలో పత్తి సాగు జరిగింది. దీనివల్ల సుమారు 8 లక్షల మెట్రిక్ టన్నుల పత్తి దిగుబడి వచ్చే అవకాశం ఉందని అధికారులు అంచనా వేశారు. పత్తి సేకరణ కేంద్రాలలో రైతులు ముందుగా రైతు సేవా కేంద్రాల్లో నమోదు చేసుకోవాల్సి ఉంటుంది. రైతులు తమ వివరాలను సీఎం యాప్ లేదా కపాస్ కిసాన్ యాప్ ద్వారా నమోదు చేసుకుని స్లాట్ బుక్ చేసుకోవాలి.

ఇక రాష్ట్రంపై ప్రభావం చూపుతున్న మొంథా తుపాను విషయంలో రైతులు ఆందోళన చెందవద్దని మంత్రి అచ్చెన్నాయుడు భరోసా ఇచ్చారు. తుపాను ప్రభావం ఉన్న ప్రాంతాలను ముందుగానే గుర్తించి, నష్ట నివారణ చర్యలు చేపట్టినట్లు ఆయన తెలిపారు. పంట నష్టాన్ని తగ్గించేందుకు శాస్త్రవేత్తలు మరియు అధికారులు రైతులకు మార్గదర్శకాలు అందిస్తున్నారని వివరించారు.

రాష్ట్రవ్యాప్తంగా వ్యవసాయ శాఖ, శాస్త్రవేత్తలు మరియు స్థానిక అధికారులు కలిసి రైతులకు సహాయపడటానికి సిద్ధంగా ఉన్నారని ప్రభుత్వం తెలిపింది. తుపాను కారణంగా పంట నష్టాలు జరగకుండా ముందస్తు చర్యలు తీసుకుంటున్నామని మంత్రి పేర్కొన్నారు. పత్తి సేకరణ కేంద్రాలు రైతుల ఆదాయాన్ని పెంచేందుకు మరియు మార్కెట్ స్థిరీకరణకు దోహదం చేస్తాయని ఆయన నమ్మకం వ్యక్తం చేశారు.