నేపాల్ నిరసనల్లో ప్రాణనష్టం పెరుగుతోంది

నేపాల్‌లో GenZ యువత ఆధ్వర్యంలో జరుగుతున్న నిరసనలు మరింత తీవ్రరూపం దాల్చుతున్నాయి. దేశవ్యాప్తంగా చోటుచేసుకున్న హింసాత్మక ఘటనల్లో ఇప్పటివరకు 30 మంది ప్రాణాలు కోల్పోయారని నేపాల్ ఆరోగ్య మంత్రిత్వ శాఖ అధికారిక ప్రకటనలో తెలిపింది. ఈ నిరసనలు రోజురోజుకీ విస్తరిస్తుండగా, ప్రభుత్వంపై ఒత్తిడి పెరుగుతోంది.

ఇక గాయపడిన వారి సంఖ్య 1,033కి చేరింది. వారిలో 713 మందిని వైద్యులు చికిత్స అనంతరం డిశ్చార్జ్ చేసినట్లు సమాచారం. ఇంకా మిగతా వందలాది మంది బాధితులు వివిధ ఆసుపత్రుల్లో చికిత్స పొందుతున్నారు. ముఖ్యంగా కాఠ్మాండూలోని సివిల్ సర్వీస్ హాస్పిటల్‌లో 436 మంది రోగులకు చికిత్స అందిస్తున్నారు.

అంతేకాకుండా దేశవ్యాప్తంగా 28 ఆసుపత్రులు గాయపడిన నిరసనకారులను, పోలీసులు, సామాన్య పౌరులను ట్రీట్ చేస్తున్నట్లు అధికారులు తెలిపారు. నిరసనలు విస్తరించడంతో భద్రతా దళాలను అప్రమత్తం చేసిన ప్రభుత్వం, పరిస్థితి అదుపులోకి తెచ్చే ప్రయత్నాలు కొనసాగిస్తోంది. కానీ నిరసనల ఉధృతి తగ్గేలా ఎటువంటి సంకేతాలు కనిపించడం లేదు.