TG పంచాయతీ ఎన్నికలు : మూడో దశ పోలింగ్ ఉత్సాహంగా సాగుతోంది

తెలంగాణ రాష్ట్రంలో గ్రామీణ రాజకీయాలకు కీలకమైన పంచాయతీ ఎన్నికల ప్రక్రియ తుదిదశకు చేరింది. ఈరోజు డిసెంబర్ 17, 2025 ఉదయం 7 గంటల నుంచే మూడో దశ సర్పంచ్ ఎన్నికల పోలింగ్‌ ప్రశాంతంగా ప్రారంభమైంది. రాష్ట్రవ్యాప్తంగా ఎన్నికల వాతావరణం ఉత్సాహంగా కొనసాగుతోంది.

మూడో దశలో భాగంగా 182 మండలాల్లోని 4,159 గ్రామ పంచాయతీలకు ఎన్నికల నోటిఫికేషన్ జారీ చేయగా, 11 గ్రామాల్లో సర్పంచ్ పదవులకు నామినేషన్లు నమోదు కాలేదు. మరోవైపు 394 సర్పంచ్ స్థానాలు ఏకగ్రీవంగా ఖరారయ్యాయి. రెండు గ్రామ పంచాయతీల్లో ఎన్నికల నిర్వహణపై న్యాయస్థానం స్టే విధించడంతో అక్కడ పోలింగ్ నిలిచిపోయింది.

దీంతో మిగిలిన 3,752 సర్పంచ్ స్థానాలకు గాను మొత్తం 12,652 మంది అభ్యర్థులు బరిలో నిలిచారు. అలాగే, 36,452 వార్డు సభ్యుల ఎన్నికలకు నోటిఫికేషన్ వెలువడగా, 116 వార్డులకు నామినేషన్లు దాఖలు కాలేదు. 7,908 వార్డులు ఏకగ్రీవంగా ఎన్నికయ్యాయి. మరో 18 వార్డుల్లో ఎన్నికలపై కోర్టు ఆదేశాలతో స్టే అమలులో ఉంది. మిగిలిన 28,410 వార్డులకు గాను 75,725 మంది అభ్యర్థులు పోటీ చేస్తున్నారు.

ఈ చివరి దశ ఎన్నికల్లో మొత్తం 53,06,395 మంది ఓటర్లు తమ ఓటు హక్కును వినియోగించుకోనున్నారు. ఇందులో 26,01,861 మంది పురుషులు, 27,04,394 మంది మహిళలు, 140 మంది ఇతర ఓటర్లు ఉన్నారు.

పోలింగ్ ముగిసిన అనంతరం మధ్యాహ్నం 2 గంటల నుంచి ఓట్ల లెక్కింపు చేపట్టి ఫలితాలను ప్రకటించనున్నారు. అనంతరం ఎన్నికైన వార్డు సభ్యులతో సమావేశం నిర్వహించి ఉపసర్పంచ్‌ను ఎన్నుకుంటారు. ఎన్నికల నిర్వహణ కోసం రాష్ట్రవ్యాప్తంగా 36,452 పోలింగ్ కేంద్రాలు ఏర్పాటు చేశారు.

భద్రతా ఏర్పాట్లపై రాష్ట్ర ఎన్నికల కమిషనర్ వివరాలు వెల్లడించారు. ప్రతి పోలింగ్ స్టేషన్ వద్ద సీసీ కెమెరాలు ఏర్పాటు చేసి పకడ్బందీగా ఏర్పాట్లు చేశామని తెలిపారు. అలాగే ఎన్నికల సంబంధిత ఫిర్యాదులు, సమాచారానికి 9240021456 టోల్‌ఫ్రీ నంబర్‌తో కాల్ సెంటర్‌ను ఏర్పాటు చేసినట్లు వెల్లడించారు. ఓటర్లు భయాందోళన లేకుండా స్వేచ్ఛగా ఓటు హక్కును వినియోగించుకోవాలని ఎన్నికల కమిషన్ కోరింది.