సీఎం రేవంత్ రెడ్డి హామీ.. ఒక పేదింటి అమ్మాయి కల నెరవేరుస్తామని ప్రకటన..

ఒక పేదింటి అమ్మాయి కలను నిజం చేసేందుకు తెలంగాణ సీఎం రేవంత్ రెడ్డి భరోసా ఇచ్చారు. కుమురం భీం అసిఫాబాద్ జిల్లా జైనూరు మండలం జెండాగూడకు చెందిన నిరుపేద ఆదివాసీ విద్యార్థిని మెస్రం సాయిశ్రద్ధకు చదువుకు తోడ్పాటును అందిస్తామని చెప్పారు. డాక్టర్‌ కావాలనే లక్ష్యంతో.. ఎంబీబీఎస్‌ సీటు సాధించినా, ఖర్చులు భరించలేక చదువుకు దూరమయ్యే పరిస్థితి వచ్చింది. ఆమె గురించి తెలుసుకున్న సీఎం రేవంత్‌ రెడ్డి చదువుకు అవసరమైన సాయం అందిస్తామని సోషల్ మీడియా వేదికగా ప్రకటించారు. ‘గిరిజన బాలిక, చదువుల తల్లి సాయిశ్రద్ధ గురించి నాకు తెలిసింది. డాక్టరు కావాలన్న ఆ అమ్మాయి కల నెరవేర్చే బాధ్యతను ప్రజా ప్రభుత్వం తీసుకొంటుంది’ అని అని రేవంత్ రెడ్డి ట్వీట్ చేశారు.

జెండాగూడడకు చెందిన నిరుపైద ఆదివాసీ కుటుంబంలో సాయిశ్రద్ధ జన్మించింది. తండ్రి మెస్రం జ్జానేశ్వర్, తల్లి లక్ష్మి. వీరికి సొంతిల్లు కూడా లేదు. జ్ఞానేశ్వర్ టైలరింగ్ పని చేస్తూ కుటుంబాన్ని పోషిస్తున్నాడు. సాయిశ్రద్ధ సోదురుడు శుబం బీటెక్ చదువుతున్నాడు.. తండ్రి కష్టపడి వారికి చదువులు చెప్పించాడు. సాయిశ్రద్ధ నార్నూర్ మండల కేంద్రంలో ప్రభుత్వ ఆశ్రమ పాఠశాలలో పదో తరగతి వరకు అక్కడే చదివింది. గవర్నమెంట్ కార్పేరేట్ పథకం ద్వారా వరంగల్ లో ఇంటర్ పూర్తి చేసింది. డాక్టర్ కావాలనే పట్టుదలో ఈ ఏడాది నీట్ రాసింది. ఎస్టీ విభాగంలో 103వ ర్యాంకు సాధించింది.

ఆ తర్వాత కౌన్సెలింగ్‌కు హాజరు కాగా.. మంచిర్యాల ప్రభుత్వ వైద్యశాలలో సీటు సాధించింది. అయితే ట్యూషన్ ఫీజు, హాస్టల్, స్టడీ మెటీరియల్ సహా ఇతర ఖర్చులు దాదాపు 1.30 లక్షలు అవుతోంది. అసలే వాళ్ళు నిరుపేద కుటుంబం కావటంతో సాయిశ్రద్ధ డాక్టర్ కావాలనే తన కల కలగానే మిగిలిపోతుందని ఆందోళన చెందారు. దాతలు సహకరించి సహాయం చేయాలని అభ్యర్థించింది. పలు పత్రికల్లో ఆమె గురించి కథనాలు ప్రచురితం అయ్యాయి. ఈ విషయం సీఎం రేవంత్ దృష్టికి రాగా.. ఆదుకుంటామని సీఎం భరోసా ఇచ్చారు.

సాయిశ్రద్ధను డాక్టర్ చేసే బాధ్యతను ప్రభుత్వం తీసుకుంటుందని సోషల్ మీడియా వేదికగా ప్రకటించారు. ఇక సీఎం హామీ ఇవ్వటం పట్ల విద్యార్థిని సాయిశ్రద్ధతో పాటుగా తండ్రి మెస్రం జ్ఞానేశ్వర్, తల్లి లక్ష్మి, ఆదివాసీ పర్ధాన్‌ సమాజ పెద్దలు సంతోషించారు. తమ బిడ్డ చదువుకు సాయం చేస్తామని ప్రకటించి సీఎం తన గొప్ప మనసు చాటుకున్నారని రేవంత్ రెడ్డి ని కొనియాడుతున్నారు.