Andhra Pradesh
Tirumala Laddu: కొత్త భక్తుడికి పంగనామాలెక్కువ… పవన్‌‍ను మళ్లీ కెలికిన ప్రకాష్ రాజ్
ఒకవైపు తిరుమల తిరుపతి లడ్డూ వ్యవహారం గురించి పెద్ద చర్చ జరుగుతోంది. అధికార పార్టీ, ప్రతిపక్ష పార్టీల మధ్య మాటల యుద్ధం జరుగుతోంది. ఇదే సమయంలో సుప్రీం కోర్టు సైతం ఈ వ్యవహారంలో ఇన్వాల్వ్‌ అవ్వడంతో ఈ విషయం మరింత రాజుకుంది. ఈ సమయంలో ప్రకాష్ రాజ్ పదే పదే ఈ అంశం గురించి జస్ట్ ఆస్కింగ్ అంటూ పవన్ కళ్యాణ్ టార్గెట్ గా ట్వీట్స్ చేయడం చర్చనీయాంశంగా మారింది. పవన్ కళ్యాణ్ పేరు ఎత్తకుండా ఇండైరెక్ట్‌ గా పదే పదే ఎక్స్ ద్వారా టార్గెట్ చేయడాన్ని కొందరు తీవ్రంగా తప్పుబడుతున్నారు. కొందరు ఈ సమయంలో ప్రకాష్ రాజ్ కి మద్దతుగా నిలుస్తున్నారు.
ఇటీవల చేయని తప్పుకు కార్తీతో క్షమాపణలు చెప్పించారు అంటూ పరోక్షంగా పవన్ కళ్యాణ్ ను ఉద్దేశించి ప్రకాష్ రాజ్ ట్వీట్ చేశారు. తాజాగా ప్రకాష్ రాజ్ ఎక్స్ లో జస్ట్ ఆస్కింగ్ అంటూ మరో ట్వీట్ వదిలారు. కొత్త భక్తుడికి పంగనామాలు ఎక్కువ, కదా? ఇక చాలు ప్రజల కోసం చేయవలసిన పనులు చూడండి. అంటూ ట్వీట్ చేశారు. ఈ ట్వీట్ పవన్ కళ్యాణ్ గురించే అని, దీక్షలు చేయడం మానేసి పరిపాలన పై దృష్టి పెట్టాలి అంటూ ప్రకాష్ రాజ్ పరోక్షంగా పవన్ కళ్యాణ్‌పై సెటైర్ వేశారంటూ నెటిజన్లు కామెంట్లు పెడుతున్నారు.
లడ్డూ వివాదం గురించి ప్రాయశ్చిత్త దీక్షను పవన్ కళ్యాణ్ చేసిన సంగతి తెలిసిందే. అసలు తప్పు జరిగిందా లేదా అనేది నిర్ధారణ కాకుండా దీక్షల పేరుతో గుడి మెట్లను శుభ్రం చేయడం సహా పవన్ హడావిడి చేసిన తీరుపై పలువురు విమర్శలు కురిపిస్తున్నారు. అయితే హిందువుల మనోభావాలను దెబ్బ తినకుండా చూడటం మా ప్రభుత్వ లక్ష్యం అన్నట్లుగా పవన్ కళ్యాణ్ చేస్తున్న వ్యాఖ్యలపై ప్రకాష్ రాజ్ ఫైర్ అవుతున్నారు. అందుకే పదే పదే ప్రకాష్ రాజ్ జస్ట్ ఆస్కింగ్ అంటూ ట్వీట్స్ చేస్తూ పవన్ కళ్యాణ్ తో పాటు ఆయన అభిమానులను రెచ్చగొడుతున్నారంటూ నెటిజన్లు కామెంట్లు చేస్తున్నారు.
కేంద్రంలో అధికారంలో ఉన్న బీజేపీకి ప్రకాష్ రాజ్ చాలా కాలంగా వ్యతిరేకంగా మాట్లాడుతున్నారు. ఇప్పుడు ఎన్డీయేలో భాగస్వామి అయిన జనసేనానిపై కుట్రపూరితంగా విమర్శలు చేస్తున్నారంటూ ప్రకాష్ రాజ్ తీరును జనసైనికులు తప్పుబడుతున్నారు. అయితే తప్పు జరిగిందో లేదో నిర్ధారణ కాకుండా ఇలాంటి సున్నితమైన విషయాలపై ప్రభుత్వంలో ఉన్న వారు కామెంట్స్ చేయడం తగదంటూ పలువురు పోస్టులు పెడుతున్నారు. మరి ప్రకాష్ రాజ్ ఇప్పటికైనా శాంతిస్తారో లేక ట్విట్టర్ యుద్ధం కొనసాగిస్తారో చూడాలి.
