OTT లోకి ‘సరిపోదా శనివారం’..

నాని హీరోగా వివేక్ ఆత్రేయ దర్శకత్వంలో వచ్చిన గత చిత్రం అంటే సుందరానికి బాక్సాఫీస్‌ వద్ద ఆశించిన స్థాయిలో పాజిటివ్‌ రెస్పాన్స్‌ రాలేదు. ప్రేక్షకులు ఆశించింది మేము ఇవ్వలేక పోయాం, అందుకే సినిమా బాక్సాఫీస్‌ వద్ద సరైన ప్రదర్శన ఇవ్వలేక పోయింది అంటూ నాని ఒక ఇంటర్వ్యూలో చెప్పుకొచ్చాడు. ఈ సారి మాత్రం గురి తప్పేది లేదు, కచ్చితంగా మా కాంబోలో రాబోతున్న ఈ సినిమా ప్రేక్షకులను ఆకట్టుకుని కమర్షియల్‌ విజయాన్ని సొంతం చేసుకుంటుందని నాని బల్ల గుద్ది మరీ చెప్పాడు. అన్నట్లుగానే సరిపోదా శనివారం సినిమా భారీ విజయాన్ని సొంతం చేసుకుంది. ఏకంగా రూ.100 కోట్ల వసూళ్లను సొంతం చేసుకున్న విషయం తెల్సిందే.

ఆగస్టు 29న ప్రేక్షకుల ముందుకు వచ్చిన సరిపోదా శనివారం సినిమా సరిగ్గా నాలుగు వారాల తర్వాత ఓటీటీ స్ట్రీమింగ్‌ కు రెడీ అవుతోంది. మూడు వారాల్లోనే ఓటీటీకి వస్తుందనే వార్తలు పుకార్లే అని తేల్చుతూ, వచ్చే వారంతో థియేట్రికల్‌ రిలీజ్ నాలుగు వారాలు పూర్తి చేసుకోనున్న నేపథ్యంలో సెప్టెంబర్‌ 26న ప్రేక్షకుల ముందుకు తీసుకు రాబోతున్నారు. థియేటర్ లో చూడలేని వారు ఓటీటీ లో చూసేందుకు ఆసక్తిగా ఉన్నారు. సినిమాకు వచ్చిన బజ్‌ నేపథ్యంలో ప్రముఖ ఓటీటీ సంస్థ నెట్‌ ఫ్లిక్స్ ఈ సినిమాను భారీ మొత్తానికి కొనుగోలు చేసిందట. అమెజాన్ ప్రైమ్‌ వీడియో వారు సైతం ఈ సినిమాని కొనుగోలు చేసేందుకు ప్రయత్నించినా నిర్మాతలు భారీ మొత్తం కోట్‌ చేసిన నెట్‌ ఫ్లిక్స్ వారికే స్ట్రీమింగ్‌ రైట్స్ ను ఇవ్వడం జరిగిందని తెలుస్తోంది.