ఉద్యోగులకు ‘మీషో’ ఆఫర్! 9 రోజులు వేతనంతో కూడిన సెలవులు..

ఏ రంగంలో పని చేస్తున్న వారైనా మానసిక, శారీరక ఆరోగ్యానికి కొంత విశ్రాంతి అవసరం. పని ఒత్తిడి భారం నుంచి తమ ఉద్యోగులకు విశ్రాంతి ఇచ్చేందుకు కొన్ని సంస్థలు ప్రత్యేక చర్యలు తీసుకుంటున్నాయి. అయితే ఇప్పుడు ఆ లిస్ట్ లో చేరింది ప్రముఖ ఈ-కామర్స్ సంస్థ అయినా మీషో. తమ ఉద్యోగులకు భారీ ఆఫర్ ప్రకటించింది. 9 రోజుల పాటు వేతనంతో కూడిన సెలవులు ఇస్తున్నట్లు తెలిపింది. తమ కంపెనీలో పని చేస్తున్న సిబ్బంది ఈ సెలవుల్లో పూర్తి విశ్రాంతి తీసుకుని, వాళ్ళు రీఛార్జ్ అయ్యేందుకు ఉపయోగపడుతుందని మీషో చెప్పింది. ఈ మేరకు సోషల్ మీడియా వేదికగా మీషో సంస్థ ఓ ప్రకటన చేసింది. వరుసగా నాలుగో సంవత్సరం కూడా ఇలా బ్రేక్ ఇస్తున్నట్లు మీషో పేర్కొంది.

ఈ 9 రోజుల పాటు ల్యాప్ టాప్స్ ఉండవు. ఇ-మెయిల్స్ రావు. స్టాండప్ కాల్స్ రావు. ఉద్యోగానికి సంబంధించి ఎలాంటి పని ఉండదు. వరుసగా నాలుగో సంవత్సరం రెస్ట్ అండ్ రీఛార్జ్ బ్రేక్ అక్టోబర్ 26వ తేదీ నుంచి నవంబర్ 3వ తేదీ వరకు ఇచ్చేందుకు సన్నద్ధమయింది. ఈ ఏడాది మెగా బ్లాగ్‌బాస్టర్ సేల్ తర్వాత పూర్తిగా విశ్రాంతి తీసుకోని మాపై మేం దృష్టి పెట్టాల్సిన సమయం వచ్చింది. కొత్త ఏడాదికి సరికొత్త శక్తిని కూడదీసుకునేందుకు ఈ రెస్ట్ అండ్ రీఛార్జ్ బ్రేక్’ అని సోషల్ మీడియా వేదికగా మీషో సంస్థ వెల్లడించింది.

తమ ఉద్యోగుల కోసం 9 రోజుల పాటు వేతనంతో కూడిన సెలవులు ప్రకటిస్తున్నట్లు వేసిన పోస్టును చూసిన నెటిజన్లు అంత తమదైన శైలిలో కామెంట్లు పెడుతున్నారు. కొందరు సంస్థ తీసుకున్న నిర్ణయంపై ప్రశంసలు కురిపించారు. ఈ విధానం ఎంతో సంతోషాన్ని ఇస్తుందని రాసుకొచ్చారు. తమ సంస్థలో పని చేస్తున్న సిబ్బంది మానసిక, శారీరక ఆరోగ్యానికి ఎంత విలువ ఇస్తున్నారు అనేది ఈ నిర్ణయాన్ని బట్టి తెలుస్తోందని పేర్కొన్నారు. పని ఒత్తిడి భారం నుంచి ఉద్యోగులకు విశ్రాంతి ఇవ్వాలనే ఆలోచన చాలా గొప్పదని, మీషోపై చాలా మంది నెటిజన్లు ప్రశంసలు కురిపించారు. ఇతర రంగాల్లోని సంస్థల్లోనూ ఇలాంటి నిర్ణయాలు ఉంటే బాగుంటుందని పలువురు అభిప్రాయపడ్డారు.