Andhra Pradesh
హైకోర్టు స్పష్టం – డిప్యూటీ సీఎం ఫొటోలకు నిషేధం లేదు
ఆంధ్రప్రదేశ్ హైకోర్టు కీలక వ్యాఖ్యలు చేసింది. ప్రభుత్వ కార్యాలయాల్లో డిప్యూటీ ముఖ్యమంత్రి ఫొటోలు ఏర్పాటు చేయడంపై ఎటువంటి నిషేధం లేదని స్పష్టం చేసింది. ఈ అంశంపై రిటైర్డ్ ఉద్యోగి వై.కొండలరావు వేసిన పిటిషన్‌ను విచారించిన న్యాయస్థానం, పిటిషన్‌ను రాజకీయ ఉద్దేశ్యాలతో దాఖలు చేసినట్లుగా గుర్తించి కొట్టివేసింది.
డిప్యూటీ సీఎం పవన్ కళ్యాణ్ ఫొటోలను కార్యాలయాల్లో ఏర్పాటు చేయడాన్ని వ్యతిరేకిస్తూ కొండలరావు దాఖలు చేసిన పిటిషన్‌పై హైకోర్టు స్పందించింది. “ఇలాంటి విషయాలను కోర్టు ముందుకు తేవడం సరికాదు. కోర్టు సమయాన్ని రాజకీయ ప్రయోజనాల కోసం వృథా చేయడం తగదు” అని న్యాయస్థానం వ్యాఖ్యానించింది.
ఈ తీర్పుతో ప్రభుత్వ కార్యాలయాల్లో డిప్యూటీ ముఖ్యమంత్రి ఫొటోలను ఏర్పాటు చేయడంపై స్పష్టత వచ్చింది. ఒకవైపు పవన్ కళ్యాణ్‌కు రాజకీయంగా ఇది బలం చేకూర్చే పరిణామంగా భావిస్తుండగా, మరోవైపు ఇలాంటి పిటిషన్లతో కోర్టును దుర్వినియోగం చేయకూడదనే హెచ్చరిక కూడా వెలువడింది.
