స్పెల్లింగ్ బీ ట్రోఫీ గెలిచిన భారత సంతతి బాలుడు

అమెరికాలో జరిగిన ప్రతిష్ఠాత్మక స్క్రిప్స్ నేషనల్ స్పెల్లింగ్ బీ 2025 పోటీలో హైదరాబాద్ మూలాలున్న భారత సంతతి బాలుడు ఫైజాన్ జాకీ విజేతగా నిలిచాడు. 13 ఏళ్ల ఈ బాలుడు, టెక్సాస్‌లోని డల్లాస్‌లోని సీఎం రైస్ మిడిల్ స్కూల్‌లో ఏడో తరగతి చదువుతున్నాడు. 21వ రౌండ్‌లో ‘ఎక్లైర్సిస్మాంట్’ (éclaircissement) అనే ఫ్రెంచ్ పదాన్ని సరిగ్గా స్పెల్ చేసి, 240 మంది పోటీదారులను వెనక్కి నెట్టి ఛాంపియన్‌గా అవతరించాడు. ఈ విజయంతో ఫైజాన్‌కు $50,000 (సుమారు 42 లక్షల రూపాయలు) నగదు బహుమతి, స్క్రిప్స్ కప్ ట్రోఫీ, మరియు జ్ఞాపిక మెడల్ లభించాయి. గత ఏడాది ఈ పోటీలో రన్నరప్‌గా నిలిచిన ఫైజాన్, ఈ సారి తన సత్తా చాటి టైటిల్ సాధించాడు.

ఈ పోటీలో ఫైజాన్‌తో పాటు ఫైనల్‌లో మరో భారత సంతతి బాలుడు సర్వద్ఞ కదమ్ రన్నరప్‌గా నిలవడం విశేషం. కాలిఫోర్నియాకు చెందిన 14 ఏళ్ల సర్వద్ఞ, ‘వాపెస్’ (Uaupés) అనే పదాన్ని తప్పుగా స్పెల్ చేయడంతో రెండో స్థానంతో సరిపెట్టుకున్నాడు. ఫైజాన్ తన స్పెల్లింగ్ ప్రతిభను ఏడేళ్ల వయసులోనే చూపించాడు, 2019లో తొలిసారి ఈ పోటీలో పాల్గొన్నప్పుడు 370వ స్థానం సాధించాడు. 2023లో 21వ స్థానం, 2024లో రన్నరప్‌గా నిలిచిన అతను, ఈ ఏడాది అద్భుతమైన ప్రదర్శనతో ఛాంపియన్‌గా నిలిచాడు. ఈ విజయం భారత సంతతి బాలుడి పట్టుదలను, పదాల పట్ల అతని ప్రేమను ప్రపంచానికి చాటింది.