శంషాబాద్ ఎయిర్పోర్టుకు బాంబు బెదిరింపు

హైదరాబాద్‌లోని రాజీవ్ గాంధీ అంతర్జాతీయ విమానాశ్రయం, శంషాబాద్ ఎయిర్‌పోర్టుకు బాంబు బెదిరింపు మెయిల్ రావడం ఒక్కసారిగా కలకలం రేపింది. “ఏ క్షణమైనా ఎయిర్‌పోర్టును బాంబుతో పేల్చేస్తాం, ఈ విషయం మీ ప్రభుత్వానికి తెలియజేయండి” అంటూ పాకిస్థాన్ స్లీపర్ సెల్స్ పేరిట ఒక ఈ-మెయిల్ రావడంతో అధికారులు వెంటనే అప్రమత్తమయ్యారు. ఈ బెదిరింపు సందేశం వచ్చిన వెంటనే, ఎయిర్‌పోర్టు భద్రతా సిబ్బంది, సీఐఎస్‌ఎఫ్, బాంబ్ స్క్వాడ్, డాగ్ స్క్వాడ్‌తో కలిసి తీవ్రస్థాయిలో తనిఖీలు చేపట్టారు. ఎయిర్‌పోర్టు ప్రాంగణంలోని ప్రతి మూలనూ క్షుణ్ణంగా పరిశీలించిన అధికారులు, ప్రయాణికుల భద్రతకు ఎలాంటి ఢోకా లేకుండా అన్ని జాగ్రత్తలూ తీసుకుంటున్నారు. ఈ ఘటనతో ఎయిర్‌పోర్టులో ఉద్విగ్న వాతావరణం నెలకొనగా, బెదిరింపు మెయిల్ పంపిన వ్యక్తులను గుర్తించేందుకు సైబర్ నిపుణులు రంగంలోకి దిగారు. ఈ సంఘటన దేశవ్యాప్తంగా జరుగుతున్న బాంబు బెదిరింపు కాల్స్ నేపథ్యంలో మరింత ఆందోళన కలిగిస్తోంది. ప్రస్తుతం ఎయిర్‌పోర్టులో భద్రతను మరింత కట్టుదిట్టం చేసిన అధికారులు, ప్రయాణికులు ఎలాంటి భయాందోళనలకు గురి కావొద్దని, సహకరించాలని కోరుతున్నారు.