విశాఖలో పర్యాటకులకు కొత్త ఆకర్షణ – గాజు వంతెన

ఆంధ్రప్రదేశ్ పర్యాటక రంగాన్ని మరింత అభివృద్ధి చేసేందుకు ప్రభుత్వం కొత్త అడుగులు వేస్తోంది. అందులో భాగంగా, విశాఖపట్నంలోని కైలాసగిరి పర్వతంపై ప్రత్యేక ఆకర్షణగా గాజు వంతెన (Glass Sky Walk Bridge)ను నిర్మిస్తున్నారు. ఇది దేశంలోనే పొడవైన గాజు వంతెనగా రూపుదిద్దుకుంటుండటంతో విశాఖ పర్యాటక హబ్‌గా మరింత గుర్తింపు పొందబోతోందని అధికారులు చెబుతున్నారు.

ఈ గ్లాస్ బ్రిడ్జ్ మొత్తం 55 మీటర్ల పొడవుతో నిర్మించబడుతోంది. రూ.7 కోట్ల వ్యయంతో వంతెన పనులను విశాఖ మెట్రోపాలిటన్ రీజియన్ డెవలప్మెంట్ అథారిటీ (VMRDA) చేపట్టింది. గాజు ఫ్లోర్‌పై నడుస్తూ కిందకు చూసే అనుభూతి పర్యాటకులకు విభిన్నమైన రోమాంచక అనుభవాన్ని కలిగించనుంది. ఇప్పటికే నిర్మాణ పనులు పూర్తికావచ్చిన దశలో ఉన్నాయని సమాచారం.

కైలాసగిరి నుండి సముద్ర తీర అందాలను మరింత దగ్గరగా వీక్షించే ప్రత్యేక అవకాశాన్ని ఈ వంతెన కల్పించనుంది. విశాఖకు వచ్చే జాతీయ, అంతర్జాతీయ పర్యాటకులు ఈ ఆకర్షణను తప్పకుండా అనుభవించేలా చేయాలన్నదే ప్రభుత్వ లక్ష్యం. త్వరలోనే గాజు వంతెనను ప్రారంభించి ప్రజలకు అందుబాటులోకి తేవాలని అధికారులు వెల్లడించారు.