Andhra Pradesh
వివేకా హత్య కేసు విచారణ మళ్లీ వాయిదా
వైఎస్ వివేకానంద రెడ్డి హత్య కేసులో విచారణ మరోసారి వాయిదా పడింది. ఈ కేసులో ఇప్పటికే అనేక మలుపులు తిరిగిన నేపథ్యంలో, సుప్రీంకోర్టు మంగళవారం విచారణ జరిపింది. విచారణలో సీబీఐ తరఫున హాజరైన అదనపు సొలిసిటర్ జనరల్ ఎస్వీ రాజు, అఫిడవిట్ దాఖలు చేయడానికి మరింత సమయం కావాలని కోర్టును అభ్యర్థించారు.
గతంలో ఈ కేసు దర్యాప్తు మరింత అవసరమా? లేదా? అన్న అంశంపై అఫిడవిట్ సమర్పించాలని సీబీఐకి ధర్మాసనం ఆదేశాలు జారీ చేసింది. అయితే ఇప్పటి వరకు అఫిడవిట్ అందజేయకపోవడంతో, సీబీఐ తరఫున మరోసారి గడువు కోరారు. దీనిపై కోర్టు చర్చించిన తర్వాత విచారణను వాయిదా వేసింది.
దీంతో వివేకా హత్య కేసు విచారణ ఈనెల 16కి మళ్లీ తరలింది. ఈ కేసు ఇప్పటికే రాజకీయంగా, చట్టపరంగా దేశవ్యాప్తంగా చర్చనీయాంశంగా మారింది. సీబీఐ తదుపరి వాదనలు, దాఖలు చేయనున్న అఫిడవిట్ ఈ కేసు దిశను నిర్ణయించనున్నాయి.
