వన్డే ర్యాంకింగ్స్‌లో రోహిత్, కోహ్లీ గల్లంతు

ICC తాజాగా విడుదల చేసిన వన్డే బ్యాటింగ్ ర్యాంకింగ్స్‌లో ఆశ్చర్యకరమైన పరిణామం చోటుచేసుకుంది. టీమిండియా స్టార్ ప్లేయర్స్ రోహిత్ శర్మ, విరాట్ కోహ్లీ పేర్లు టాప్-100లో కూడా కనిపించకపోవడం అభిమానుల్లో, క్రికెట్ వర్గాల్లో పెద్ద చర్చనీయాంశమైంది. కేవలం వారం క్రితం వరకు రోహిత్ 2వ స్థానం, కోహ్లీ 4వ స్థానంలో ఉన్నారు. కానీ తాజా జాబితాలో వారిద్దరి పేర్లు పూర్తిగా మిస్సయి ఉండటం గందరగోళానికి దారితీసింది.

రిటైర్మెంట్ సంకేతమా లేక టెక్నికల్ లోపమా?
వారి పేర్లు లేకపోవడంతో సోషల్ మీడియాలో ఊహాగానాలు తెరపైకి వచ్చాయి. ఇది ఎలాంటి టెక్నికల్ గ్లిచ్ కారణమా లేక రిటైర్మెంట్‌కు సంకేతమా అన్న ప్రశ్నలు అభిమానులను కలవరపెడుతున్నాయి. వన్డేల్లో రోహిత్, కోహ్లీ లాంటి దిగ్గజాలు ఒకేసారి జాబితాలో లేకపోవడం సహజం కాదని పలువురు భావిస్తున్నారు. ముఖ్యంగా, ఇటీవలే వీరిద్దరూ వన్డే ఫార్మాట్‌ నుంచి తప్పుకుంటారనే వార్తలు వస్తుండటంతో ఈ పరిణామం ఆ వార్తలకు మరింత బలాన్నిస్తోంది.

ICC రూల్స్ ప్రకారం పరిస్థితి
ICC నిబంధనల ప్రకారం ఒక ఆటగాడు 9-12 నెలల పాటు వన్డే మ్యాచ్‌లు ఆడకపోతే అతని పేరు ర్యాంకింగ్స్ నుంచి ఆటోమేటిక్‌గా తొలగించబడుతుంది. రోహిత్, కోహ్లీ చివరిసారి 2025 మార్చిలో ఛాంపియన్స్ ట్రోఫీలో వన్డేలు ఆడారు. దాని తర్వాత నుంచి వారు ఈ ఫార్మాట్‌లో ఆడకపోవడంతో తాజాగా వారి పేర్లు ర్యాంకింగ్స్‌ నుంచి మాయమయ్యాయి. దీంతో అభిమానులు నిరాశ చెందుతున్నా, ఇది రిటైర్మెంట్ సంకేతమా లేక కేవలం నిబంధనల ప్రకారం జరిగినదా అనేది స్పష్టత కావాలి.