లెటర్ టు డాడీ”తో ఓటీటీ సినిమా తీయొచ్చు: కేంద్ర మంత్రి బండి సంజయ్ వ్యంగ్య వ్యాఖ్యలు

తెలంగాణ రాజకీయాల్లో మరోసారి కుటుంబ రాజకీయాలపై కేంద్ర మంత్రి బండి సంజయ్ తీవ్ర విమర్శలు గుప్పించారు. ఇటీవల బీఆర్ఎస్ నేత కవిత తన తండ్రి, మాజీ సీఎం కేసీఆర్‌కు రాసిన ఓలేఖపై స్పందించిన బండి సంజయ్, దానిపై వ్యంగ్యంగా స్పందిస్తూ ఆసక్తికర వ్యాఖ్యలు చేశారు.

“‘లెటర్ టు డాడీ’ అంశంతో “కాంగ్రెస్ వదిలిన బాణం” అనే ఓటీటీ సినిమా తీయొచ్చు” అంటూ సంజయ్ ట్విట్టర్‌లో పేర్కొన్నారు. ఇది పూర్తిగా ఫ్యామిలీ డ్రామా తంతు అంటూ విమర్శలు గుప్పించారు. ఈ తరహా ఎమోషనల్ డ్రామాలను ప్రజలు ఇప్పుడు సీరియస్‌గా తీసుకోరన్నారు. వారి ఆత్మీయ భావోద్వేగాలను పిలుపుగా ఉపయోగించి రాజకీయ లబ్ధి పొందాలన్న ప్రయత్నాలు ఫలించవని తేల్చేశారు.

ప్రజలకు కావలసింది మార్పు, అభివృద్ధి అని బండి సంజయ్ పేర్కొన్నారు. “ఇప్పుడు ప్రజలు సెంటిమెంట్ల కంటే అభివృద్ధి, పారదర్శక పాలన కోరుకుంటున్నారు. అలాంటి మార్పును తెచ్చే శక్తి ఒక్క బీజేపీదే” అని స్పష్టంచేశారు. ప్రజాభిప్రాయ సర్వేల ప్రకారం తెలంగాణలో బీజేపీ గ్రాఫ్ ఎప్పటికప్పుడు పెరుగుతుండటం ఇదే మాటను స్పష్టం చేస్తోందని తెలిపారు.

“మా పార్టీ ఎప్పుడూ కుటుంబ పాలనకు వ్యతిరేకం” అని మరోసారి రిపీట్ చేశారు. పార్టీ విలువలు, పారదర్శకత, ప్రజల భవిష్యత్తు పట్ల ఉన్న నిబద్ధతను గుర్తుచేశారు.

ఈ వ్యాఖ్యలు రాజకీయ వర్గాల్లో చర్చనీయాంశమవుతున్నాయి. కవిత లేఖపై విమర్శలు చేయడం కొత్తేమీ కాకపోయినా, ఓటీటీ సినిమా కోణంలో దీన్ని చూపించడం నెటిజన్ల దృష్టిని ఆకర్షించింది. పలు ట్వీట్లు, మీమ్స్ కూడా సోషల్ మీడియాలో చక్కర్లు కొడుతున్నాయి.

ఇటీవలి కాలంలో తెలంగాణ రాజకీయ వేదిక మీద బీజేపీ తరచూ కుటుంబ పాలనను లక్ష్యంగా చేసుకొని విమర్శలు చేస్తుండగా, ఈ వ్యాఖ్యలు ఆ విమర్శల్ని మరింత వేడెక్కించనున్నాయి.