రేషన్ షాపుల్లో కందిపప్పు లేని బాధ: లబ్ధిదారుల నిరాశ

ఆంధ్రప్రదేశ్‌లో రేషన్ లబ్ధిదారులకు మరోసారి నిరాశ ఎదురైంది. రాష్ట్రవ్యాప్తంగా రేషన్ షాపుల్లో ఈ నెల కూడా కందిపప్పు పంపిణీ జరగకపోవడంతో ప్రజలు అసంతృప్తి వ్యక్తం చేస్తున్నారు. గత కొన్ని నెలలుగా సరఫరా నిలిచినప్పటికీ, ఆగస్టు పండుగల సీజన్ నేపథ్యంలో ఈసారి అందుతుందని ప్రజలు ఆశించారు. అయితే, షాపులకు వెళ్లిన తర్వాతే వారికి అసలు విషయం తెలిసి, నిరుత్సాహం చెందుతున్నారు.

పలుచోట్ల లబ్ధిదారులు చెప్పిన వివరాల ప్రకారం, కొన్నిచోట్ల కేవలం అరకొర సరఫరా మాత్రమే జరిగిందని తెలుస్తోంది. తక్కువ మొత్తంలో వచ్చిన కందిపప్పును షాపులు ప్రాధాన్యత క్రమంలో కొద్ది మందికి మాత్రమే ఇచ్చినట్లు తెలుస్తోంది. ఇతరులకు మాత్రం “ఇప్పుడు స్టాక్ లేదు” అంటూ తిరస్కరించారు. దీంతో అవసరమైనంత పప్పు రేషన్ షాపుల్లో దొరకక, మళ్ళీ ఖరీదైన మార్కెట్‌కే వెళ్లాల్సి వచ్చింది.

ప్రస్తుతం మార్కెట్లో కందిపప్పు కిలో ధర ₹110–₹120 వరకు ఉండటంతో, సామాన్య ప్రజలకు భారం పెరిగింది. ప్రభుత్వమే కనీసం పండుగ సమయాల్లో అయినా కందిపప్పును రేషన్ షాపుల ద్వారా సరఫరా చేయాలని లబ్ధిదారులు కోరుతున్నారు. “మీకు కందిపప్పు అందిందా?” అంటూ సామాజిక మాధ్యమాల్లో చర్చ జరుగుతోంది. ప్రజలు తమ అనుభవాలను కామెంట్ల రూపంలో వ్యక్తం చేస్తున్నారు.