భర్తకు భార్య రాఖీ కట్టొచ్చా? కొన్ని ప్రాంతాల్లో విశిష్ట ఆచారం

రాఖీ పౌర్ణమి అనగానే అన్నాచెల్లెళ్ల అనుబంధానికి ప్రతీకగా భావిస్తారు. సాధారణంగా సోదరునికి సోదరి రాఖీ కడుతూ, రక్షణ కోసం అతడిని ఆశీర్వదిస్తూ ఈ పండుగను జరుపుకుంటారు. కానీ దేశంలోని కొన్ని ప్రాంతాల్లో రాఖీ కేవలం సోదరులకే పరిమితం కాదు. మధ్యప్రదేశ్‌లోని చింద్వాడా, మాల్వా ప్రాంతాలతో పాటు ఉత్తర భారతదేశంలోని పలు ప్రాంతాల్లో మహిళలు తమ భర్తలకు కూడా రాఖీ కట్టే ఆచారాన్ని పాటిస్తున్నారు.

ఈ ఆచారానికి ఆధారంగా పురాణాల్లో కనిపించే కథను పేర్కొంటారు. దేవేంద్రుడికి ఆయన భార్య ఇంద్రాణి రాఖీ కట్టిందన్న విశ్వాసం ఈ సంప్రదాయానికి బలాన్ని ఇస్తోంది. భార్య భర్తను కేవలం జీవిత భాగస్వామిగా కాక, తన రక్షకునిగా కూడా భావిస్తూ ఈ రాఖీ కట్టే పద్ధతిని అనుసరిస్తోంది. ఇది భర్త చేసే ‘బాధ్యతా’ ప్రమాణానికి గుర్తుగా కూడా భావించబడుతోంది.

ఈ సంప్రదాయం ప్రతి ఇంట్లో ఉండకపోయినా, కొన్ని కుటుంబాల్లో ఇది దశాబ్దాలుగా కొనసాగుతోంది. మహిళలు భర్తకు రాఖీ కడుతూ – “నన్ను జీవితాంతం రక్షించు” అనే ఆశయాన్ని వ్యక్తీకరిస్తారు. పాతకథల ఆధారంగా ప్రస్తుతకాలంలో ఈ పద్ధతికి మళ్లీ ప్రాచుర్యం లభిస్తోంది. మీరు కూడా మీ కుటుంబంలో ఈ విధానం పాటిస్తారా?