Latest Updates
బెంగళూరు తొక్కిసలాట ఘటనపై మెజిస్టీరియల్ విచారణకు సీఎం సిద్దరామయ్య ఆదేశం
బెంగళూరులోని చిన్నస్వామి స్టేడియం వద్ద రాయల్ చాలెంజర్స్ బెంగళూరు (RCB) విజయోత్సవ సందర్భంగా జరిగిన తొక్కిసలాట ఘటనపై కర్ణాటక ముఖ్యమంత్రి సిద్దరామయ్య కీలక నిర్ణయం తీసుకున్నారు. ఈ ఘటనలో 10 మంది అభిమానులు ప్రాణాలు కోల్పోగా, బీజేపీ నుంచి వస్తున్న విమర్శలకు సీఎం సిద్దరామయ్య తీవ్రంగా స్పందించారు. “మహా కుంభమేళాలో తొక్కిసలాట జరిగినప్పుడు మీరు ఏం చేశారు?” అని బీజేపీ నేతలను ప్రశ్నిస్తూ కౌంటర్ ఇచ్చారు. ఈ ఘటనపై మెజిస్టీరియల్ విచారణకు ఆదేశిస్తూ, 15 రోజుల్లో విచారణ కమిషన్ నివేదిక సమర్పించాలని ఆయన స్పష్టం చేశారు.
సీఎం సిద్దరామయ్య ఈ ఘటనను రాజకీయం చేయాలని తాము భావించడం లేదని, అలాగని జరిగిన దాన్ని సమర్థించుకోవడం కూడా లేదని తెలిపారు. ప్రాథమిక సమాచారం ప్రకారం, స్టేడియం గేట్లను అభిమానులు బద్దలు కొట్టుకొని లోపలికి దూసుకొచ్చే సమయంలో ఈ తొక్కిసలాట జరిగినట్లు ఆయన వెల్లడించారు. ఈ ఘటన బాధ్యులను గుర్తించడంతో పాటు, భవిష్యత్తులో ఇలాంటి దుర్ఘటనలు జరగకుండా నివారణ చర్యలు తీసుకోవడంపై దృష్టి సారించాలని సీఎం పేర్కొన్నారు. ఈ విషాదం జనసమూహ నిర్వహణలో లోపాలను బట్టబయలు చేసిన నేపథ్యంలో, విచారణ నివేదిక ఆధారంగా తగిన చర్యలు తీసుకుంటామని ఆయన హామీ ఇచ్చారు.
