తెలంగాణ స్టార్టప్‌లకు భారీ బూస్ట్ | రూ.1000 కోట్లు ప్రత్యేక ఫండ్ ఏర్పాటు

తెలంగాణ ప్రభుత్వం రాష్ట్రంలో స్టార్టప్‌లను ప్రోత్సహించేందుకు కీలక నిర్ణయం తీసుకుంది. స్టార్టప్‌లకు అవసరమైన నిధులు అందుబాటులో ఉండేలా రూ.1000 కోట్ల ప్రత్యేక నిధిని ఏర్పాటు చేయాలని ప్రభుత్వం నిర్ణయించింది. ఈ ఫండ్ ద్వారా టెక్నాలజీ ఆధారిత స్టార్టప్‌లను రాష్ట్ర ప్రభుత్వం మరింతగా ప్రోత్సహించబోతోందని ఐటీ శాఖ ప్రత్యేక ప్రధాన కార్యదర్శి సంజయ్ కుమార్ వెల్లడించారు.తెలంగాణలో స్టార్టప్ ఎకోసిస్టమ్‌ను బలోపేతం చేయడంలో భాగంగా ప్రభుత్వం ఈ Fund of Funds ఏర్పాటు చేస్తోంది. నిధులను యాక్సెస్ చేయడంలో స్టార్టప్‌లు ఎదుర్కొనే సమస్యలను పరిష్కరించేందుకు ఈ ఫండ్ పెద్ద మద్దతుగా నిలవనుంది. మొదటి దశలో రూ.1000 కోట్ల నిధిని సమీకరించి వెంచర్ క్యాపిటల్, ఏంజెల్ ఫండ్స్‌లో పెట్టుబడులు పెట్టే అవకాశాలపై ప్రభుత్వం పరిశీలిస్తోంది.ఆర్టిఫిషియల్ ఇంటెలిజెన్స్ (AI) రంగంలో పనిచేసే స్టార్టప్‌లకు ఈ ఫండ్ ద్వారా ప్రత్యేక ప్రాధాన్యత ఇవ్వనుందని ఐటీ శాఖ మంత్రి డి.శ్రీధర్ బాబు తెలిపారు. తెలంగాణను ప్రపంచ AI హబ్‌గా తీర్చిదిద్దాలనే లక్ష్యంతో ప్రభుత్వం పెద్దఎత్తున భాగస్వామ్యాలు ఏర్పాటు చేస్తోంది. మెటా వంటి ప్రముఖ కంపెనీలతో కలిసి ఉద్యోగులకు AI శిక్షణ అందజేసి, స్టార్టప్‌లతో కలిసి ఆధునిక పరిష్కారాలను అభివృద్ధి చేసే అవకాశాలను సృష్టిస్తోంది.స్టార్టప్‌ను స్థాపించాలని భావించే ఔత్సాహికులు ముందుగా టీ-హబ్ వంటి ఇంక్యుబేషన్ సెంటర్లలో నమోదు కావాల్సి ఉంటుంది. ప్రాథమిక దశలో స్టార్టప్ పనితీరు సక్సెస్ అయితే ఈ ఫండ్ ద్వారా నిధులను పొందే అవకాశం ఉంటుంది. ఫండ్ ఏర్పాటు ప్రక్రియ తుది దశలో ఉండగా, త్వరలోనే ప్రభుత్వం పూర్తి మార్గదర్శకాలను విడుదల చేయనుంది. ఈ నిధుల ద్వారా తెలంగాణలో స్టార్టప్ వృద్ధి మరింత వేగం అందుకోనుందని నిపుణులు భావిస్తున్నారు.