డిఫెన్స్ ఆపరేషన్ల ప్రత్యక్ష ప్రసారంపై కేంద్రం కఠిన ఆదేశాలు: మీడియాకు హెచ్చరిక

న్యూఢిల్లీ, మే 9: దేశ భద్రతకు సంబంధించిన డిఫెన్స్ ఆపరేషన్లు, భద్రతా దళాల కదలికలను ప్రత్యక్ష ప్రసారం చేయవద్దని కేంద్ర ప్రభుత్వం మీడియా ఛానల్స్, డిజిటల్ ప్లాట్‌ఫామ్‌లకు కఠిన ఆదేశాలు జారీ చేసింది. ఇటువంటి సున్నితమైన సమాచారం బహిర్గతం కావడం వల్ల సైనిక ఆపరేషన్లు దెబ్బతినడమే కాకుండా, సైనికుల ప్రాణాలకు తీవ్ర ముప్పు వాటిల్లవచ్చని కేంద్రం హెచ్చరించింది.

కార్గిల్ యుద్ధం, 26/11 ముంబై ఉగ్రదాడులు, కాందహార్ విమాన హైజాకింగ్ వంటి గత ఘటనలను ఉదాహరణగా పేర్కొంటూ, ఈ తరహా ప్రసారాలు శత్రు శక్తులకు పరోక్షంగా సహాయపడతాయని కేంద్రం స్పష్టం చేసింది. అధికారికంగా విడుదలైన సమాచారాన్ని మాత్రమే ప్రచారం చేయాలని, ఊహాగానాలకు లేదా అనధికార సమాచారానికి ఆస్కారం ఇవ్వవద్దని మీడియా సంస్థలను ఆదేశించింది.

ఆధునిక సాంకేతికత, సోషల్ మీడియా వేగంగా విస్తరిస్తున్న నేపథ్యంలో సమాచారం తక్షణమే వ్యాప్తి చెందే ప్రమాదం ఉందని కేంద్రం ఆందోళన వ్యక్తం చేసింది. ఇది దేశ భద్రతకు ముప్పు కలిగించవచ్చని, అందువల్ల మీడియా సంస్థలు జాతీయ భద్రతకు ప్రాధాన్యత ఇచ్చి బాధ్యతాయుతంగా వ్యవహరించాలని సూచించింది. భద్రతా దళాల ఆపరేషన్లకు సంబంధించిన ఏవైనా వివరాలను ప్రసారం చేసే ముందు అధికారుల నుండి అనుమతి తీసుకోవాలని, లేనిపక్షంలో కఠిన చర్యలు తప్పవని కేంద్రం హెచ్చరించింది.

ఈ మార్గదర్శకాలు దేశ భద్రతను కాపాడేందుకు, సైనిక ఆపరేషన్ల సాఫీగా నిర్వహణకు ఉద్దేశించినవని కేంద్రం తెలిపింది. మీడియా సంస్థలు ఈ ఆదేశాలను కచ్చితంగా పాటించాలని, జాతీయ భద్రతలో తమ వంతు బాధ్యతను నిర్వర్తించాలని కోరింది.