కర్నూలు బస్సు ప్రమాదం వెనుక నిజాలు: సీటింగ్ పర్మిషన్‌తో మొదలై స్లీపర్‌గా మారిన బస్సు కథ!

కర్నూలు జిల్లా చిన్న టేకూరు సమీపంలో జరిగిన ఘోర రోడ్డు ప్రమాదం రాష్ట్రాన్ని కుదిపేసింది. కావేరీ ట్రావెల్స్‌కు చెందిన బస్సు ప్రమాదంలో 19 మంది మృతి చెందగా, మరికొందరు గాయపడ్డారు. విచారణలో షాకింగ్ వివరాలు బయటకు వస్తున్నాయి. ఈ బస్సును తొలుత సీటింగ్ అనుమతితో తయారు చేసి, తరువాత అక్రమంగా స్లీపర్‌ కోచ్‌గా మార్చినట్లు రవాణా శాఖ అధికారులు తెలిపారు. అంతేకాకుండా 2018లో తెలంగాణలో రిజిస్ట్రేషన్ చేసిన వాహనాన్ని 2023లో డయ్యూ డామన్‌లో మళ్లీ రిజిస్ట్రేషన్ చేయడం దర్యాప్తులో తేలింది.

ప్రమాద సమయంలో ప్రయాణికులు గాఢ నిద్రలో ఉన్నారని, డ్రైవర్ నియంత్రణ కోల్పోవడంతో బస్సు రోడ్డుపక్కన తిరగబడి మంటలు చెలరేగాయని పోలీసులు తెలిపారు. గంజాయి లేదా మద్యం ప్రభావం ఉందా అనే అంశంపైన కూడా దర్యాప్తు సాగుతోంది. అధికారులు తెలిపారు, రాయగడ రవాణా శాఖ నుంచి సీటింగ్ పర్మిషన్ మాత్రమే తీసుకున్నప్పటికీ, యాజమాన్యం స్లీపర్‌గా మార్పులు చేసిందని. ఇది నిబంధనలకు విరుద్ధమని స్పష్టమైంది.

ప్రమాదానికి గురైన బస్సు రాయగడలో ఫిట్‌నెస్ తీసుకున్న తర్వాత Telanganaలో రిజిస్ట్రేషన్ చేసుకుని, ఆల్ ఇండియా పర్మిట్ పొందింది. తరువాత NOCతో డయ్యూ డామన్‌లో మళ్లీ రిజిస్ట్రేషన్ చేసి, స్లీపర్ కోచ్‌గా నడిపినట్లు రవాణా శాఖ నిర్ధారించింది. కావేరీ ట్రావెల్స్ యాజమాన్యం ఇంకా ఈ ఘటనపై స్పందించకపోవడం గమనార్హం. ఈ ఘటనతో ప్రైవేట్ ట్రావెల్స్ సంస్థలపై భద్రతా ప్రమాణాలపైన ప్రశ్నలు మళ్లీ లేవుతున్నాయి.

మరోవైపు, ఏపీ ప్రభుత్వం మృతుల కుటుంబాలకు రూ.5 లక్షలు, గాయపడిన వారికి రూ.2 లక్షల చొప్పున పరిహారం ప్రకటించింది. హోం మంత్రి వంగలపూడి అనిత, డీజీపీతో కలిసి ఘటనాస్థలిని పరిశీలించి, బాధితులను పరామర్శించారు. ఈ ఘటనపై 16 ప్రత్యేక బృందాలతో విచారణ కొనసాగుతోందని తెలిపారు. రవాణా శాఖ మంత్రి మండిపల్లి రాంప్రసాద్ రెడ్డి, అన్ని కోణాల్లో దర్యాప్తు జరుగుతోందని, భవిష్యత్తులో ఇలాంటి ఘటనలు పునరావృతం కాకుండా చర్యలు తీసుకుంటామని అన్నారు.