ఏపీ రైతులకు భారీ రాయితీ – ప్లాస్టిక్ బాక్స్‌లపై 50% సబ్సిడీ ప్రారంభం

ఆంధ్రప్రదేశ్ ప్రభుత్వం మామిడి మరియు టమాటా రైతులకు శుభవార్తను అందించింది. పంట రవాణా ఖర్చులను తగ్గిస్తూ, 50% రాయితీతో ప్లాస్టిక్ బాక్స్‌లను అందించే ప్రత్యేక సబ్సిడీ పథకాన్ని ప్రారంభించింది. ఈ పథకం ద్వారా రైతులు తక్కువ ఖర్చుతోనే తమ పంటలను మార్కెట్‌కు తరలించుకునే అవకాశం లభిస్తోంది. ప్రారంభ దశగా, అనంతపురం జిల్లాలో మొత్తం 52,500 బాక్స్‌ల పంపిణీ లక్ష్యంగా నిర్ణయించారు.ఉద్యానశాఖ వివరాల ప్రకారం, మామిడి రైతులకు 24 కిలోల సామర్థ్యం గల బాక్స్‌లు, టమాటా రైతులకు 15 కిలోల సామర్థ్యం గల బాక్స్‌లు అందుబాటులో ఉంటాయి. మామిడి రైతులకు హెక్టారుకు 250 బాక్స్‌లు, టమాటా రైతులకు హెక్టారుకు 100 బాక్స్‌లు అందజేయబడతాయి. 24 కిలోల బాక్స్ పూర్తి ధర రూ.240 అయితే, సబ్సిడీ తర్వాత రైతు కేవలం రూ.120 మాత్రమే చెల్లిస్తే సరిపోతుంది. అలాగే 15 కిలోల బాక్స్ పూర్తి ధర రూ.120 కాగా, రైతులకు ఇది రూ.60కే అందుతోంది.రైతులు ఈ రాయితీ బాక్స్‌ల కోసం తమ సమీపంలోని రైతు సేవా కేంద్రాల్లో (RSKs) దరఖాస్తు చేసుకోవచ్చు. బాక్స్‌ల నాణ్యత బలంగా ఉండటం వల్ల పంటలు రవాణా సమయంలో పాడయ్యే ప్రమాదం తగ్గుతుంది. దీంతో రైతులకు అదనపు ఆదాయం లభించడంతో పాటు మార్కెట్‌ చేరుకునే సమయానికి పంట నష్టం తగ్గుతుంది. ప్రత్యేకించి మామిడి సీజన్‌ సమయంలో ఈ బాక్స్‌లు రైతులకు భారీగా ఉపయపడతాయని అధికారులు తెలిపారు.ఈ పథకం గురించి పూర్తి వివరాలను తెలుసుకోవాలనుకునే రైతులు డివిజన్ స్థాయి ఉద్యానశాఖ అధికారులను సంప్రదించవచ్చు. పంటల రవాణా సౌకర్యాన్ని మెరుగుపరిచే ఈ సబ్సిడీ పథకం రైతులకు ఆర్థికంగా పెద్ద సహకారం అందించనుంది. మామిడి మరియు టమాటా రైతుల కోసం ప్రభుత్వం అందిస్తున్న ఈ రాయితీ, వ్యవసాయ రంగంలో రైతు సంక్షేమానికి మరో కీలక అడుగుగా భావిస్తున్నారు. త్వరగా దరఖాస్తు చేసుకుని ఈ అవకాశాన్ని సద్వినియోగం చేసుకోవాలని అధికారులు సూచిస్తున్నారు.