ఆ జిల్లాకు ఒక్క రూపాయైనా ఇచ్చారా?

హైదరాబాద్‌: వికారాబాద్‌ జిల్లాకు నిధుల కేటాయింపుపై మాజీ మంత్రి సబితా ఇంద్రారెడ్డి ప్రశ్నలు సంధించారు. సీఎం రేవంత్‌ రెడ్డి పదవిలోకి వచ్చిన రెండు సంవత్సరాలుగా ఈ జిల్లాకు ఒక్క రూపాయైనా కేటాయించారా అని ఆమె నిలదీశారు. ప్రజల ఆకాంక్షలకు తగ్గట్టుగా అభివృద్ధి పనులు జరగకపోవడం బాధాకరమని ఆమె పేర్కొన్నారు.

సీఎం తాను పాలమూరు బిడ్డనని చెప్పుకుంటూ వచ్చారని, కానీ పాలమూరు-రంగారెడ్డి ప్రాజెక్టు 80 శాతం పూర్తి అయినా మిగిలిన పనులను విస్మరిస్తున్నారని సబిత విమర్శించారు. ఈ ప్రాజెక్టు పూర్తి అయితేనే ప్రాంత ప్రజలకు తాగునీరు, సాగునీరు లభిస్తుందని గుర్తుచేశారు.

“నిజంగా పాలమూరు బిడ్డవే అయితే, ఈ ప్రాజెక్టును పూర్తి చేసి మీ చిత్తశుద్ధిని నిరూపించండి” అంటూ సీఎం రేవంత్‌ను సవాలు చేశారు. జిల్లాలో ప్రజల సమస్యలను పరిష్కరించడం పక్కన పెట్టి హామీలతో మభ్యపెడుతున్నారని ఆరోపించారు.