తిరుమలలో భక్తుల తాకిడి.. మూడు రోజులు దర్శన టికెట్లకు బ్రేక్!

తిరుమల శ్రీ వేంకటేశ్వర స్వామి సన్నిధానం భక్తులతో కిటకిటలాడుతోంది. వరుస సెలవులు, కొత్త సంవత్సరం, వైకుంఠ ఏకాదశి సందర్భంగా లక్షలాది భక్తులు తిరుమలకు తరలివచ్చారు. కొండమొత్తం భక్తులతో నిండిపోయి, క్యూ లైన్లు ఆలయం బయటకు విస్తరించిపోయాయి. శిలాతోరణం వరకు సర్వ దర్శనం క్యూలు కొనసాగుతుండగా, అలిపిరి వద్ద వాహనాలు వేల సంఖ్యలో నిలిచిపోయాయి.

ప్రస్తుతం శ్రీవారి సర్వ దర్శనానికి సుమారు 30 గంటల సమయం పడుతుందని టీటీడీ అధికారులు చెప్పారు. పెరుగుతున్న రద్దీ దృష్ట్యా, భక్తుల సౌకర్యం కోసం తిరుమల తిరుపతి దేవస్థానం కొన్ని కీలక నిర్ణయాలు తీసుకుంది. ముఖ్యంగా సామాన్య భక్తులకు ప్రాధాన్యం ఇచ్చేలా ఏర్పాట్లు చేస్తోంది.

భక్తుల రద్దీ పెరగడంతో శ్రీవాణి ఆఫ్‌లైన్ దర్శన టికెట్ల జారీని తాత్కాలికంగా రద్దు చేసినట్లు టీటీడీ ప్రకటించింది. ఈ నెల 27, 28, 29 తేదీలకు సంబంధించి, తిరుమల శ్రీవాణి దర్శన టికెట్ కౌంటర్లలో, తిరుపతి రేణిగుంట విమానాశ్రయం కౌంటర్లలో ఆఫ్‌లైన్ టికెట్లు జారీ చేయబడవని స్పష్టం చేసింది. ఈ మార్పును గమనించి, భక్తులు తమ దర్శన ప్రణాళికలను ముందుగానే మార్చుకోవాలని సూచించింది.

అయితే అలిపిరి భూదేవి కాంప్లెక్స్ వద్ద దివ్య దర్శనం టోకెన్ల కోసం భక్తులు భారీగా బారులు తీరారు. సర్వ దర్శనం టోకెన్లు పూర్తవడంతో, నడకదారిలో ఉన్న భక్తుల కోసం దివ్య దర్శనం టోకెన్లకు డిమాండ్ ఒక్కసారిగా పెరిగింది. ఎలాంటి తోపులాటలు జరగకుండా టీటీడీ సెక్యూరిటీ, పోలీసు సిబ్బంది అప్రమత్తంగా ఉంటూ పరిస్థితిని నియంత్రిస్తున్నారు.

వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు నిండిపోయాయి. కాబట్టి క్యూ లైన్లు బయటకు వచ్చాయి. నారాయణగిరి ఉద్యానవనంలోని షెడ్లు కూడా పూర్తిగా నిండిపోయాయి. నారాయణగిరి నుంచి శిలాతోరణం వరకు, అక్కడి నుంచి ఆక్టోపస్ భవనం దాకా దాదాపు మూడు కిలోమీటర్ల మేర క్యూ లైన్లు కొనసాగుతున్నాయి.

భక్తుల రద్దీ మరికొన్ని రోజులు కొనసాగే అవకాశముందని అధికారులు అంచనా వేస్తున్నారు. ముఖ్యంగా ఈ నెల 30వ తేదీ నుంచి పది రోజుల పాటు వైకుంఠ ఏకాదశి సందర్భంగా ఉత్తర ద్వార దర్శనం ప్రారంభం కానున్నందున, తిరుమలలో భక్తుల సందడి మరింత పెరగనుంది. పరిస్థితికి అనుగుణంగా భక్తులకు సౌకర్యాలు కల్పించేందుకు టీటీడీ ఎప్పటికప్పుడు నిర్ణయాలు తీసుకుంటోంది.

#Tirumala#TTD#SrivariDarshan#Tirupati#VaikuntaEkadasi#BhaktaRaddi#SarvaDarshan#DivyaDarshan
#SriVaniTickets#UttaraDwaraDarshan#TirumalaUpdates#DevotionalNews