టీటీడీ మాజీ ఛైర్మన్ కుటుంబానికి షాక్.. కుమారుడు, కుమార్తెపై హత్య ఆరోపణలు

రియల్ ఎస్టేట్ వ్యాపారి రఘునాథ్ అనుమానాస్పద మృతి కేసు మరో కీలక మలుపు తిరిగింది. ఈ కేసులో టీటీడీ మాజీ ఛైర్మన్, మాజీ ఎంపీ డీకే ఆదికేశవులు నాయుడు కుమారుడు శ్రీనివాస్‌, కుమార్తె కల్పజలను సీబీఐ అధికారులు అరెస్టు చేయడం తీవ్ర కలకలం రేపింది. వీరితో పాటు అప్పట్లో కేసును విచారించిన ఇన్‌స్పెక్టర్‌, ప్రస్తుత డీఎస్పీ మోహన్‌ను కూడా సీబీఐ అదుపులోకి తీసుకుంది.

ఓ గెస్ట్ హౌస్‌లో రఘునాథ్ ఉరి వేసుకున్న స్థితిలో మృతిచెందడంతో 2019 మే నెలలో బెంగళూరులోని వైట్‌ఫీల్డ్ ప్రాంతంలో మరో సంచలనం సృష్టించింది. అయితే ఇది ఆత్మహత్య కాదని, తన భర్తను కిడ్నాప్ చేసి హత్య చేసి, ఆత్మహత్యగా చిత్రీకరించారని రఘునాథ్ భార్య మంజు ఆరోపించారు. ఈ మేరకు ఆమె బెంగళూరు హెచ్ఏఎల్ పోలీస్ స్టేషన్‌లో ఫిర్యాదు చేశారు.

ఈ ఫిర్యాదులో శ్రీనివాస్‌తో పాటు పలువురు వ్యక్తుల పేర్లు ఉండటంతో కేసు కీలకంగా మారింది. రఘునాథ్ ఆస్తులను నకిలీ స్టాంపుపేపర్ల ద్వారా అక్రమంగా రాయించుకున్నారన్న ఆరోపణలు కూడా ఈ కేసులో ఉన్నాయి. రఘునాథ్ కర్ణాటక, ఆంధ్రప్రదేశ్ రాష్ట్రాల్లో భూముల వ్యాపారం నిర్వహించేవారని దర్యాప్తులో వెల్లడైంది.

ఆ తర్వాత అప్పట్లో కేసు విచారణ చేసిన పోలీసు అధికారి మోహన్ కోర్టుకు బీ-రిపోర్ట్ ఆత్మహత్యగా ప్రకటించారు. దీనిపై అసంతృప్తి వ్యక్తం చేసిన మంజు హైకోర్టును ఆశ్రయించగా, ముందుగా సిట్ ఏర్పాటు జరిగింది. అయితే సిట్ కూడా ఆత్మహత్యగా నివేదిక ఇవ్వడంతో, చివరికి హైకోర్టు సీబీఐ దర్యాప్తుకు ఆదేశాలు జారీ చేసింది.

ప్రస్తుతం ఈ కేసును చెన్నై కేంద్రంగా సీబీఐ దర్యాప్తు చేస్తోంది. తాజా దర్యాప్తులో భాగంగా కీలక ఆధారాలు లభించడంతో శ్రీనివాస్‌, కల్పజ, మోహన్‌లను అరెస్టు చేసినట్లు సమాచారం. కోర్టులో హాజరుపరిచిన అనంతరం ముగ్గురికీ రిమాండ్ విధించగా, వారిని హరప్పన అగ్రహార సెంట్రల్ జైలుకు తరలించారు.

నాయుడు కుటుంబ సభ్యుల అరెస్టుతో ఈ కేసు రాజకీయ, వ్యాపార వర్గాల్లో మళ్లీ చర్చనీయాంశమైంది. సీబీఐ దర్యాప్తులో మరిన్ని సంచలన విషయాలు వెలుగులోకి వచ్చే అవకాశం ఉందని అధికారులు సూచిస్తున్నారు.

#CBIArrest#DKAdikesavuluNaidu#RaghunathDeathCase#CBIInvestigation#TTDFormerChairman#RealEstateScam#FakeStampPapers
#HighCourtOrders#CrimeNewsTelugu#PoliticalNews