‘కాంతార చాప్టర్ 1’ రెండు వారాల్లో రూ.700 కోట్ల ఊచకోత – ‘ఛావా’ రికార్డ్ బద్దలు కొట్టే దిశగా!

‘కాంతార చాప్టర్ 1’ సినిమా బాక్సాఫీస్ వద్ద తుఫాను సృష్టిస్తోంది. కేవలం రెండు వారాల్లోనే ఈ సినిమా రూ.700 కోట్ల గ్రాస్ వసూళ్లు రాబట్టి, 2025లో అత్యధిక కలెక్షన్లు సాధించిన చిత్రాల్లో రెండో స్థానంలో నిలిచింది. రిషబ్ శెట్టి స్వీయ దర్శకత్వంలో రూపొందిన ఈ చిత్రం, ‘కాంతార’ మూవీకి ప్రీక్వెల్‌గా తెరకెక్కింది. హోంబలే ఫిల్మ్స్ భారీ బడ్జెట్‌తో నిర్మించిన ఈ చిత్రం, అన్ని భాషల్లోనూ ప్రేక్షకులను ఆకట్టుకుంటోంది.

మేకర్స్ విడుదల చేసిన అధికారిక పోస్టర్ ప్రకారం, ‘కాంతార చాప్టర్ 1’ ప్రపంచవ్యాప్తంగా రూ.717 కోట్లకు పైగా వసూలు చేసింది. కన్నడతో పాటు తెలుగు, హిందీ, తమిళం, మలయాళ భాషల్లోనూ మంచి వసూళ్లు సాధిస్తోంది. ఈ ఏడాది మొదటి రెండు వారాల్లోనే ఇంత భారీ వసూళ్లు సాధించడం విశేషంగా చెప్పుకోవాలి.

ఇప్పటివరకు ‘ఛావా’ సినిమా రూ.800 కోట్ల కలెక్షన్లతో టాప్ ప్లేస్‌లో ఉన్నప్పటికీ, ‘కాంతార చాప్టర్ 1’ దానిని అధిగమించే దిశగా దూసుకుపోతోంది. దీపావళి వారాంతం కారణంగా థియేటర్లలో ఆక్యుపెన్సీ పెరగడం వల్ల రాబోయే రోజుల్లో రికార్డ్ బ్రేక్ చేసే అవకాశం ఉందని ట్రేడ్ వర్గాలు భావిస్తున్నాయి.

తెలుగు రాష్ట్రాల నుంచి మాత్రమే రూ.105 కోట్లకు పైగా వసూళ్లు వచ్చినట్లు సమాచారం. హిందీ వెర్షన్ కూడా రూ.164 కోట్లను దాటింది. నార్త్ బెల్ట్‌లో కూడా ఈ చిత్రం అద్భుతమైన రన్ కొనసాగిస్తోంది. దాంతో, ‘కాంతార చాప్టర్ 1’ కన్నడ సినిమా చరిత్రలోనే మరొక భారీ బ్లాక్‌బస్టర్‌గా నిలిచే అవకాశాలు పుష్కలంగా ఉన్నాయి.