రూ.4,500 నుంచి రూ.12,500కు దూకుడు… ఏపీ యువతకు సీఎం గుడ్ న్యూస్

ఆంధ్రప్రదేశ్‌లో పోలీస్ ఉద్యోగాలకు ఎంపికైన ట్రైనీ కానిస్టేబుళ్లకు ముఖ్యమంత్రి నారా చంద్రబాబు నాయుడు కీలక శుభవార్త అందించారు. శిక్షణలో ఉన్న కానిస్టేబుళ్లకు ప్రభుత్వం చెల్లించే స్టైఫండ్‌ను మూడు రెట్లు పెంచుతూ సంచలన నిర్ణయం తీసుకున్నారు. ఇప్పటివరకు రూ.4,500గా ఉన్న స్టైఫండ్‌ను నేరుగా రూ.12,500కు పెంచుతున్నట్లు సీఎం ప్రకటించారు.

మంగళగిరిలోని ఏపీఎస్సీ పరేడ్ గ్రౌండ్‌లో నిర్వహించిన కానిస్టేబుల్ నియామక పత్రాల ప్రదాన కార్యక్రమంలో చంద్రబాబు పాల్గొని ఈ ప్రకటన చేశారు. ఈ సందర్భంగా మొత్తం 5,757 మంది ఎంపికైన కానిస్టేబుల్ అభ్యర్థులకు అపాయింట్‌మెంట్ లెటర్లు అందజేశారు. డిసెంబర్ 22 నుంచి వీరికి అధికారికంగా శిక్షణ ప్రారంభం కానుంది.

వేదికపై మాట్లాడిన సీఎం చంద్రబాబు… ఎన్నికల సమయంలో యువతకు ఉద్యోగాలు ఇస్తామని ఇచ్చిన హామీని అమలు చేస్తున్నామని తెలిపారు. మెగా డీఎస్సీతో పాటు కానిస్టేబుల్ ఉద్యోగాల భర్తీ ద్వారా ఇచ్చిన మాటను నిలబెట్టుకున్నామని పేర్కొన్నారు. నాలుగేళ్ల పాటు ఉద్యోగాల కోసం ఎదురుచూసిన ఏపీ యువతకు ఈ రోజు న్యాయం జరిగిందన్నారు.

కానిస్టేబుల్ ఉద్యోగ నియామకాలపై దాఖలైన న్యాయపోరాటాలను అధిగమించి నియామక ప్రక్రియను పూర్తి చేశామని చంద్రబాబు వెల్లడించారు. తన పాలనలోనే 23 వేలకుపైగా పోలీస్ ఉద్యోగాలు భర్తీ చేసినట్లు తెలిపారు. టీడీపీ హయాంలోనే ఉద్యోగ భద్రత ఉంటుందన్న నమ్మకాన్ని వ్యక్తం చేస్తూ, ఎంపికైన అభ్యర్థులకు శుభాకాంక్షలు తెలియజేశారు.

ఈ కార్యక్రమంలో హోం మంత్రి వంగలపూడి అనిత కూడా పాల్గొన్నారు. నాలుగేళ్ల నిరీక్షణ తర్వాత కానిస్టేబుల్ అభ్యర్థుల కల సాకారమైందని ఆమె పేర్కొన్నారు. నియామకాలపై కోర్టుల్లో ఉన్న కేసులను పరిష్కరించి, అభ్యర్థులకు నియామక పత్రాలు అందించామని తెలిపారు. ప్రజా భద్రతే రాష్ట్ర అభివృద్ధికి పునాదని, ఆ దిశగా ప్రభుత్వం కట్టుబడి ఉందన్నారు.

పోలీస్ యూనిఫామ్‌ను గౌరవంతో పాటు బాధ్యతగా భావించాలని, ప్రజల్లో విశ్వాసాన్ని పెంచుకునేలా పని చేయాలని కొత్తగా ఎంపికైన కానిస్టేబుళ్లకు సూచించారు. అలాగే పోలీస్ ఉద్యోగంలో ఉండే కష్టాలను కుటుంబ సభ్యులు కూడా అర్థం చేసుకోవాలని హోం మంత్రి కోరారు.

ఈ నిర్ణయంతో ట్రైనీ కానిస్టేబుళ్లలో ఉత్సాహం వెల్లివిరిసింది.

#APConstableJobs#TraineeConstables#ChandrababuNaidu#APPolice#StipendHike#APGovernment
#PoliceRecruitment#YouthEmployment#GoodNewsAP#LawAndOrder#PublicSafety#TDPGovernment