పెద్ద ఇంటర్నేషనల్ పైరసీ రాకెట్‌పై నాగార్జున హెచ్చరిక – “ఇది ఫ్రీ కాదు.. బిగ్ ట్రాప్!

టాలీవుడ్ ఇండస్ట్రీని సంవత్సరాలుగా వేధిస్తున్న పైరసీ మాఫియాపై తెలంగాణ పోలీసులు కీలక దాడి నిర్వహించడంతో సినీ రంగం ఊపిరి పీల్చుకుంది. ఐ-బొమ్మ వెబ్‌సైట్ నిర్వాహకుడిని అరెస్ట్ చేయడం పట్ల సినీ ప్రముఖులు అభినందనలు తెలియజేశారు. ఈ సందర్భంలో అక్కినేని నాగార్జున పైరసీ వెనుక చిన్న స్థాయి నెట్‌వర్క్ కాదు, భారీ అంతర్జాతీయ మోసగాళ్ల గుంపు ఉందని, వారు కేవలం కొన్ని కోట్లు కాదు, భారీ‌గా ప్రజల వ్యక్తిగత డేటాను లక్ష్యంగా చేసుకుంటారని స్పష్టంగా వెల్లడించారు.

హైదరాబాద్ పోలీసు కమిషనర్ సజ్జనార్ ఆధ్వర్యంలో జరిగిన మీడియా సమావేశంలో చిరంజీవి, రాజమౌళి, దిల్ రాజు, సురేష్ బాబు వంటి పలువురు ప్రముఖులు పాల్గొన్నారు. ఈ వేదికపై మాట్లాడిన నాగార్జున, “పైరసీ వల్ల తెలుగు కాదు, దేశవ్యాప్తంగా ఉన్న అన్ని పరిశ్రమలు నష్టపోతున్నాయి” అని చెప్పారు. ఇటీవల అరెస్ట్ అయిన నిందితుడిపై చెన్నై నుంచి కూడా ప్రశంసలు వచ్చాయని పేర్కొన్నారు.

ఈ సందర్భంగా నాగార్జున ఒక పెద్ద విషయాన్ని బయటపెట్టారు. కొన్ని నెలల క్రితం తమ కుటుంబ సభ్యులలో ఒకరిని రెండు రోజులపాటు “డిజిటల్ అరెస్ట్” చేశారు అని షాకింగ్ వివరాలు వెల్లడించారు. ఓ అనుమానాస్పద లింక్‌పై క్లిక్ చేసిన వెంటనే వారి ఫోన్, వ్యక్తిగత సమాచారం మొత్తం హ్యాకర్ల చేతుల్లో పడిపోయిందని చెప్పారు. పోలీసులు ప్రయత్నించినా, హ్యాకర్లు ఎంత పద్ధతిగా పనిచేశారో చెప్పలేనంతగా వారు కనుమరుగైపోయారని తెలిపారు.

“ఫ్రీగా సినిమాలు చూస్తున్నామనుకోవద్దు… అది అసలు ఉద్దేశమే కాదు” అంటూ నాగార్జున హెచ్చరించారు. పైరసీ సైట్ల లక్ష్యం వినోదం కాదు, మీ డేటా, మీ డబ్బు దోచుకోవడమే అని వివరించారు. ప్రస్తుతం బయటపడిన మూడు కోట్లు అసలు అసలు మొత్తం కాదని, హ్యాకర్లకు అది చిల్లర మాత్రమేనని చెప్పారు. ప్రజలు పైరసీ సైట్లను దూరంగా ఉంచాలని, ఇది ఒక పెద్ద ట్రాప్ అని, వేల కోట్ల మోసం జరుగుతుందని జాగ్రత్తగా ఉండాలని సూచించారు.