మాల్దీవులకు వెళ్లే పర్యటకులకు షాక్.. ఎగ్జిట్ ఫీజు భారీగా పెరిగింది!

మాల్దీవుల ఆర్థిక వ్యవస్థకు పర్యాటక రంగం కీలకం. భారతీయులే మాల్దీవుల పర్యాటక ఆదాయంలో ప్రధాన భాగస్వాములు. కానీ, కొత్త అధ్యక్షుడు భారత్‌తో గొడవకు దిగడంతో భారతీయ పర్యాటకుల సంఖ్య 33% తగ్గిందని మాల్దీవుల పర్యాటక మంత్రిత్వ శాఖ పేర్కొంది. ఈ పరిస్థితి ఆ దేశానికి గట్టి దెబ్బతీసింది. ఇప్పుడు, పర్యటన ముగించుకుని వెళ్తున్న పర్యాటకుల నుంచి కూడా ఎగ్జిట్ ఫీజు వసూలు చేస్తోంది.

మాల్దీవులకు వెళ్లే పర్యాటకులకు ప్రభుత్వం కొత్త భారం పెడుతోంది. డిసెంబర్ 1 నుంచి ఎగ్జిట్‌ ఫీజు పెంచాలని ముయిజ్జు సర్కారు నిర్ణయించింది. టూర్ ముగించుకుని విమానాల్లో వెళ్లే ప్రయాణికుల నుంచి ఎగ్జిట్‌ ఫీజు వసూలు చేస్తున్నారు. ఎకానమీ క్లాస్‌ ప్రయాణికుల ఫీజు 30 డాలర్ల నుంచి 50 డాలర్లకు (రూ.4220) పెరిగింది. బిజినెస్‌ క్లాస్‌కు 60 నుంచి 120 డాలర్లకు, ఫస్ట్‌ క్లాస్‌కు 90 నుంచి 240 డాలర్లకు, ప్రైవేటు జెట్‌ ప్రయాణికులకు 120 నుంచి 480 డాలర్లకు పెంపు చేశారు.

మాల్దీవులకు వచ్చే విదేశీయులందరికీ ఎగ్జిట్‌ ఫీజు వర్తిస్తుంది, ఇది వయసు లేదా పాస్‌పోర్టుతో సంబంధం లేకుండా ఉంటుంది. ఈ ఫీజు ప్రయాణ దూరం లేదా సమయంతో సంబంధం లేకుండా ఒకేలా ఉంటుంది. మాల్దీవుల ప్రభుత్వం ఈ ఫీజు పెంపును ప్రకటిస్తూ, ఈ ఆదాయాన్ని వెలానా అంతర్జాతీయ విమానాశ్రయ నిర్వహణకు ఉపయోగిస్తామని చెప్పింది. చాలామంది పర్యాటకులకు ఎగ్జిట్‌ ఫీజు గురించి తెలియకపోవచ్చు, ఎందుకంటే ఇది విమాన టిక్కెట్‌లోనే కలుపుతారు. డిసెంబర్ 1 నుంచి ఫీజులు పెరుగుతాయి, కాబట్టి నవంబర్ 30లోగా టిక్కెట్లు బుక్‌ చేసుకోవాలని కొన్ని విమానయాన సంస్థలు సూచిస్తున్నాయి. తాము ఈ సమాచారాన్ని తమ వెబ్‌సైట్‌లో కూడా పొందుపరుస్తున్నాయని చెబుతున్నారు.

గత ఏడాదితో పోలిస్తే ఈ ఏడాది మాల్దీవులకు వెళ్లే పర్యాటకుల సంఖ్య తగ్గింది. మాల్దీవుల ఆర్థిక వ్యవస్థకు ముఖ్యమైన పర్యాటకం ఆదాయం తగ్గిపోవడం వల్ల ఆర్థిక పరిస్థితి దెబ్బతింది. నవంబర్‌లో ముయిజ్జు అధ్యక్షుడిగా బాధ్యతలు చేపట్టిన తర్వాత భారత వ్యతిరేక విధానాలు తీసుకుని, చైనాకు దగ్గరవుతున్నారు. ఇదే సమయంలో ప్రధాని మోదీ లక్షద్వీప పర్యటనపై మాల్దీవుల మంత్రులు చేసిన వ్యాఖ్యలు భారతీయులను ఆగ్రహానికి గురిచేశాయి. దాంతో ‘‘మాల్దీవుల బాయ్‌కాట్’’కి పిలుపు వచ్చింది. ఈ కారణంగా మాల్దీవులకు వెళ్లే భారతీయ పర్యాటకుల సంఖ్య తగ్గిపోయింది. గత ఏడాది పర్యాటకుల్లో భారతీయులు మొదటి స్థానంలో ఉండగా, ఈ ఏడాది నాలుగో స్థానానికి పడిపోయారు. గతంలో పర్యాటకుల్లో భారతీయుల వాటా 10% ఉండగా, ఇప్పుడు అది 6%కి తగ్గింది.