నన్ను క్షమించండి పవన్ కళ్యాణ్ సర్.. కార్తీ ట్వీట్

దేశమంతా కూడా తిరుమల లడ్డూ కల్తీ వ్యవహారం గురించి చర్చిస్తోంది. ఈ క్రమంలో తన ఈవెంట్లో లడ్డూ గురించి టాపిక్ వస్తే ఖండించాల్సింది పోయి.. ఇప్పుడు ఇది సెన్సిటివ్ టాపిక్.. ఇప్పుడు ఇది మనకొద్దు అంటూ కాస్త ఫన్నీగా సైడ్ చేసే ప్రయత్నం చేశాడు కార్తీ. దీనిపై పవన్ కళ్యాణ్ మండిపడ్డాడు. లడ్డూ మీద జోకులా? అంటూ ఆగ్రహం వ్యక్తం చేశాడు. కార్తీకి స్వీట్ వార్నింగ్ ఇచ్చాడు. ఇక పవన్ కళ్యాణ్ వ్యాఖ్యల మీద కార్తీ స్పందించాడు. పవన్ కళ్యాణ్ సర్ మీకు నా క్షమాపణలు అంటూ ట్వీట్ వేశాడు.

మీరంటే నాకు ఎంతో గౌరవం ఉంది సర్.. నేను అనుకోకుండా మాట్లాడిన మాటల్లో ఇలా అపార్థాలు ఏర్పడినందుకు నేను క్షమాపణలు కోరుతున్నాను. నేను కూడా ఆ వేంకటేశ్వర స్వామికి భక్తుడినే.. నేను ఎల్లప్పుడూ మన సంప్రదాయాలను గౌరవిస్తాను అంటూ ట్వీట్ వేశాడు. దీంతో వివాదం పెద్దది కాకుండా కార్తీ తెలివిగా పుల్ స్టాప్ పెట్టినట్టు కనిపిస్తోంది. మరి ప్రకాష్ రాజ్ అయితే ఎలాంటి కౌంటర్లు వేస్తాడో చూడాలి. ఇలా కార్తీలా సున్నితంగా అయితే స్పందించి వివాదానికి తావు లేకుండా ట్వీట్ అయితే వేయడని అందరికీ తెలిసిందే.

కార్తీ తన సత్యం సుందరం సినిమా ఈవెంట్లో యాంకర్ అడిగిన ఏదో ప్రశ్నకు ఇలా సమాధానం చెబితే.. అది చివరకు ఇలా కాంట్రవర్సీగా మారింది. కానీ వెంటనే కార్తీ స్పందించి.. క్షమాపణలు చెప్పి వాటికి పుల్ స్టాప్ పెట్టే ప్రయత్నం చేశాడు.