ఆంధ్రప్రదేశ్‌కు భారీ పెట్టుబడులు: 44 వేల ఉద్యోగావకాశాలు!!

ఆంధ్రప్రదేశ్‌ రాష్ట్రంలో ఐటీ, ఎలక్ట్రానిక్స్ రంగాలలో భారీగా పెట్టుబడులు రానున్నాయి. ఇటీవల రాష్ట్ర స్థాయి పెట్టుబడుల ప్రోత్సాహక మండలి (ఎస్‌ఐపీబీ) ఆమోదించిన ప్రతిపాదనలకు రాష్ట్ర ప్రభుత్వం తాజాగా అనుమతులు జారీ చేసింది. సుమారు రూ. 27 వేల కోట్ల విలువైన ఈ పెట్టుబడుల ద్వారా రాష్ట్రంలో 44 వేల మందికి పైగా ఉద్యోగావకాశాలు లభిస్తాయని అంచనా.

ప్రభుత్వం ఈ కంపెనీలకు రాయితీలు, ప్రోత్సాహకాలతో పాటు భూములను కూడా కేటాయించింది. ఈ కంపెనీలు విశాఖపట్నం, కర్నూలు, తిరుపతి జిల్లాల్లో ఐటీ క్యాంపస్‌లు, సెమీకండక్టర్ యూనిట్లు, తయారీ యూనిట్లను స్థాపించనున్నాయి.

• క్వార్క్స్‌ టెక్నోసాఫ్ట్‌ ప్రైవేట్‌ లిమిటెడ్‌: ఈ సంస్థ విశాఖపట్నంలో రూ. 115 కోట్లతో ఐటీ క్యాంపస్‌ ఏర్పాటు చేయనుంది. దీని ద్వారా 2,000 మందికి ఉద్యోగాలు లభిస్తాయి. ప్రభుత్వం ఈ సంస్థకు కాపులుప్పాడ సమీపంలో ఎకరం రూ. కోటి చొప్పున 4 ఎకరాల భూమిని కేటాయించింది. ఏపీ ఐటీ, జీసీసీ పాలసీ 4.0 కింద ప్రోత్సాహకాలు అందించనుంది.
• విశాఖ రియాల్టీ ప్రైవేట్‌ లిమిటెడ్‌: మధురవాడ ప్రాంతంలో రూ. 2,200 కోట్లతో ఐటీ పార్కు అభివృద్ధి ప్రతిపాదనకు ఆమోదం లభించింది. ఈ ప్రాజెక్ట్ ద్వారా సుమారు 30,000 మందికి ఉపాధి దొరుకుతుందని ప్రభుత్వం భావిస్తోంది.
• ఏఎన్‌ఎస్‌ఆర్‌ గ్లోబల్‌ కార్పొరేషన్‌ ప్రైవేట్‌ లిమిటెడ్‌: మధురవాడ ఐటీ హిల్స్‌లో రూ. 1,000 కోట్లతో గ్లోబల్‌ ఇన్నోవేషన్‌ సిటీ క్యాంపస్‌ ఏర్పాటు చేయనుంది. ఈ సంస్థ 10,000 మందికి ఉద్యోగాలు కల్పించనుంది. దీనికి 33 ఏళ్ల లీజు ప్రాతిపదికన 10.29 ఎకరాలను కేటాయించగా, లీజు వ్యవధిని 99 ఏళ్లకు పెంచడానికి ప్రభుత్వం అనుమతించింది.
• ఇండిచిప్‌ సెమీకండక్టర్స్‌ లిమిటెడ్‌: కర్నూలు జిల్లాలోని ఓర్వకల్లులో రూ. 22,976 కోట్లతో సిలికాన్‌ కార్బైడ్‌ డివైజ్‌ తయారీ యూనిట్‌ను ఏర్పాటు చేయనుంది. ఈ యూనిట్ ద్వారా 1,241 మందికి ఉపాధి అవకాశాలు లభించనున్నాయి. ఈ సంస్థకు రూ. 10 లక్షల చొప్పున 150 ఎకరాల భూమిని కేటాయించారు.
• ఎస్‌సీఐసీ వెంచర్స్‌ ఎల్‌ఎల్‌పీ: తిరుపతి జిల్లాలోని శ్రీ సిటీలో రూ. 550 కోట్లతో బీఎల్‌డీసీ మోటార్లు (BLDC Motors), రాగి ట్యూబ్‌ల తయారీ యూనిట్‌ను స్థాపించేందుకు అనుమతులు లభించాయి. ఈ కంపెనీ ద్వారా 1,130 మందికి ఉద్యోగాలు లభించనున్నాయి.

ఈ పెట్టుబడులకు సంబంధించిన ప్రతిపాదనల ఆమోదం, భూముల కేటాయింపు ఉత్తర్వులను ప్రభుత్వం జారీ చేసింది.