హైదరాబాద్ ఫిల్మ్‌నగర్‌లో భారీ చోరీ – 43 తులాల బంగారం, లక్ష నగదు మాయం!

హైదరాబాద్‌ నగరంలో దొంగల దౌర్జన్యం ప్రజలను భయాందోళనకు గురి చేస్తోంది. తాజా ఘటనలో, ఫిల్మ్‌నగర్‌ పోలీస్ స్టేషన్ పరిధిలో ఉన్న ఓయూ కాలనీలో భారీ చోరీ జరిగింది. స్వప్న అనే మహిళ ఇంట్లో 43 తులాల బంగారు ఆభరణాలు, రూ. 1 లక్ష నగదు అదృశ్యమయ్యాయి.

పోలీసుల తెలిపిన వివరాల ప్రకారం, ఇటీవల తన భర్తను కోల్పోయిన స్వప్న గత నెల 27వ తేదీన అత్తవారింటికి వెళ్లారు. సుమారు ఎనిమిది రోజులు తర్వాత అక్టోబర్ 5న తిరిగి ఇంటికి వచ్చారు. ఇంటి తాళాలు పగిలిపోయి ఉండటం గమనించిన ఆమె, వెంటనే లోపలికి వెళ్లి పరిశీలించగా ఇంట్లోని విలువైన వస్తువులు యధేచ్ఛగా చిందరపడిన దృశ్యం కనిపించింది. అనంతరం 43 తులాల బంగారం, లక్ష రూపాయల నగదు చోరీకి గురైనట్టు గుర్తించారు.

దొంగలు తలుపులు పగులగొట్టి ఇంట్లోకి ప్రవేశించి ప్లాన్‌చేసిన రీతిలో చోరీ చేసినట్టు అనుమానిస్తున్నారు. బాధితురాలి ఫిర్యాదు మేరకు ఫిల్మ్‌నగర్‌ పోలీసులు కేసు నమోదు చేసి దర్యాప్తు ప్రారంభించారు. క్లూస్‌ టీంను ఘటనా స్థలానికి రప్పించి వేలిముద్రలు, ఇతర సాక్ష్యాలను సేకరిస్తున్నారు. అలాగే ప్రాంతంలోని సీసీటీవీ ఫుటేజ్‌లను కూడా విశ్లేషిస్తున్నారు.

ఈ సంఘటనతో ఓయూ కాలనీ వాసుల్లో భయం పెరిగింది. కాలనీలో దొంగతనాలు పెరుగుతున్న నేపథ్యంలో పోలీసులు నిఘా వ్యవస్థను బలోపేతం చేయాలని స్థానికులు డిమాండ్ చేస్తున్నారు. చోరీ జరిగిన సమయం, దొంగల ప్రయోగించిన పద్ధతుల ఆధారంగా పోలీసులు విచారణ కొనసాగిస్తున్నారు.