హైడ్రా చర్యతో రూ.750 కోట్ల ప్రభుత్వ భూమి రక్షణ – స్థానికుల ప్రశంసల వర్షం!

హైదరాబాద్ నగరంలోని అత్యంత ప్రైమ్ ఏరియాగా పేరుగాంచిన బంజారాహిల్స్ రోడ్ నంబర్ 10లో జరుగుతున్న భారీ భూకబ్జాకు హైడ్రా (HYDRA – Hyderabad Disaster Response and Asset Protection Agency) అడ్డుకట్ట వేసింది. సుమారు రూ.750 కోట్ల విలువైన ఐదు ఎకరాల ప్రభుత్వ భూమిని స్వాధీనం చేసుకోవడంలో హైడ్రా సిబ్బంది మెరుపు వేగంతో చర్యలు తీసుకున్నారు. ఈ నిర్ణయంతో స్థానికులు ఆనందం వ్యక్తం చేస్తూ, హైడ్రా చర్యలను ప్రశంసించారు.

ఈ భూమిలో 1.20 ఎకరాలను ప్రభుత్వం తాగునీటి అవసరాల కోసం జలమండలికి వాటర్ రిజర్వాయర్ నిర్మాణం కోసం కేటాయించింది. అయితే, పార్థసారథి అనే వ్యక్తి మొత్తం ఐదు ఎకరాల భూమి తనదేనంటూ కోర్టులో కేసు వేశారు. వివాదం కొనసాగుతుండగా, ఆ భూమిని అక్రమంగా ఆక్రమించి, ఫెన్సింగ్ వేసి, వేట కుక్కలు మరియు బౌన్సర్లతో కాపలా పెట్టాడు. అంతేకాకుండా, ఆ ప్రాంతంలో షెడ్లు నిర్మించి మద్యం సేవించడం వంటి కార్యకలాపాలు జరిపాడని స్థానికులు ఫిర్యాదు చేశారు.

జలమండలి మరియు రెవెన్యూ అధికారులు దీనిపై హైడ్రాకు ఫిర్యాదు చేయడంతో, అధికారులు దర్యాప్తు చేపట్టి పార్థసారథి మోసం బట్టబయలైంది. అసలు ప్రభుత్వ సర్వే నంబర్ 403 కాగా, దాన్ని నకిలీ 403/52 బై నంబర్‌గా మార్చి, రిజిస్టర్ కాని సేల్ డీడ్ ఆధారంగా భూమి స్వాధీనం చేసుకోవడానికి ప్రయత్నించాడని హైడ్రా నిర్ధారించింది.

దీనిపై బంజారాహిల్స్ పోలీస్ స్టేషన్‌లో నాలుగు క్రిమినల్ కేసులు నమోదు చేయబడ్డాయి. షేక్‌పేట రెవెన్యూ అధికారుల అభ్యర్థన మేరకు హైడ్రా బృందం భారీ పోలీసు బందోబస్తుతో దిగి, పార్థసారథి ఏర్పాటు చేసిన ఫెన్సింగ్, షెడ్లను పూర్తిగా తొలగించింది. అనంతరం కొత్త ఫెన్సింగ్ ఏర్పాటు చేసి, “ఇది ప్రభుత్వ భూమి” అని బోర్డులు అమర్చింది.

ఈ చర్యతో వాటర్ రిజర్వాయర్ ప్రాజెక్ట్‌కు ఉన్న అడ్డంకులు తొలగిపోయాయి. హైడ్రా ధైర్యవంతమైన చర్యకు స్థానికులు కృతజ్ఞతలు తెలుపుతూ, ఇలాంటి వ్యవస్థ ప్రతి జిల్లాలో ఉండాలని కోరుకున్నారు.