తెలంగాణలో కొత్త జిల్లా రూపకల్పన? రెవెన్యూ డివిజన్ల మార్పులపై చర్చ

తెలంగాణలో పరిపాలనను ప్రజలకు మరింత చేరువ చేయాలనే లక్ష్యంతో రాష్ట్ర ప్రభుత్వం జిల్లాల పునర్వ్యవస్థీకరణ దిశగా కీలక అడుగులు వేస్తోంది. గత ప్రభుత్వ హయాంలో వేగంగా చేపట్టిన జిల్లాల విభజన వల్ల ఏర్పడిన లోపాలు, పాలనాపరమైన అడ్డంకులను తొలగించడమే ఈ మార్పుల ప్రధాన ఉద్దేశమని ప్రభుత్వ వర్గాలు వెల్లడిస్తున్నాయి. శాస్త్రీయ ప్రమాణాలతో సరిహద్దుల సవరణ చేపట్టాలని ముఖ్యమంత్రి రేవంత్ రెడ్డి భావిస్తున్నట్లు సమాచారం.

రాష్ట్ర అవతరణ తర్వాత మొదట 10 జిల్లాలుగా ఉన్న తెలంగాణను 33 జిల్లాలుగా విస్తరించారు. అయితే ఈ విభజనలో సరైన ప్రణాళిక లేకపోవడం వల్ల కొన్ని మండలాలు రెండు వేర్వేరు శాసనసభ నియోజకవర్గాల్లోకి వెళ్లాయి. మరికొన్ని నియోజకవర్గాలు మూడు జిల్లాల పరిధిలో ఉండటంతో పరిపాలనలో అయోమయం నెలకొంది. దీని ప్రభావం నిధుల కేటాయింపు, సంక్షేమ పథకాల అమలు, అభివృద్ధి పనుల పర్యవేక్షణపై స్పష్టంగా కనిపిస్తోందని ప్రభుత్వం గుర్తించింది.

ముఖ్యంగా కలెక్టర్ల మధ్య సమన్వయం లోపించడం, అధికార వ్యవస్థలో జాప్యాలు చోటుచేసుకోవడం, జోనల్ విధానం కారణంగా ఉద్యోగుల పదోన్నతులు ఆలస్యమవడం వంటి సమస్యలు తీవ్రంగా ఉన్నాయని అధికారికంగా అంచనా వేస్తున్నారు. ఈ పరిస్థితిని చక్కదిద్దేందుకు గతంలో జరిగిన తప్పిదాలు పునరావృతం కాకుండా జుడీషియల్ కమిటీ ఏర్పాటు చేసి సరిహద్దుల మార్పులు చేపట్టే యోచనలో ప్రభుత్వం ఉంది.

ఈ అంశంపై అసెంబ్లీ వేదికగా రెవెన్యూ శాఖ మంత్రి పొంగులేటి శ్రీనివాస్ రెడ్డి కూడా స్పష్టత ఇచ్చారు. అవసరమైతే కొన్ని రెవెన్యూ డివిజన్లు, మండలాల సంఖ్యను పునఃసమీక్షించి కుదించే అవకాశముందని ఆయన పేర్కొన్నారు. ప్రస్తుతం తెలంగాణలో 33 జిల్లాలు, 74 రెవెన్యూ డివిజన్లు, 612 మండలాలు ఉండగా.. కొత్తగా మరో 12 డివిజన్లు, 25 మండలాల ఏర్పాటు కోసం ప్రభుత్వానికి వినతులు అందినట్లు తెలుస్తోంది.

జిల్లాల సరిహద్దుల్లో మార్పులు జరిగితే ప్రస్తుతం అమల్లో ఉన్న రెండు బహుళ జోన్లు, ఏడు జోన్ల వ్యవస్థలోనూ సవరణలు అవసరం అవుతాయి. దీని ప్రభావం ఉద్యోగుల నియామకాలు, బదిలీలు, పదోన్నతులపై పడే అవకాశం ఉంది. మరోవైపు దేశవ్యాప్తంగా కొనసాగుతున్న జనగణన పూర్తయ్యే వరకు జిల్లాల సరిహద్దులు మార్చవద్దని కేంద్ర ప్రభుత్వం సూచించినట్లు సమాచారం. అత్యవసర పరిస్థితుల్లో మార్పులు చేపట్టాలంటే కేంద్ర అనుమతితో పాటు రైల్వే, పోస్టల్, సర్వే ఆఫ్ ఇండియా వంటి సంస్థల నుంచి ఎన్‌ఓసీలు పొందాల్సి ఉంటుంది.

ప్రజల సౌకర్యం, పాలనలో స్పష్టత తీసుకురావడమే లక్ష్యంగా చేపట్టబోయే ఈ జిల్లాల పునర్వ్యవస్థీకరణ ద్వారా తెలంగాణ పరిపాలనా రూపురేఖలు రానున్న రోజుల్లో గణనీయంగా మారే అవకాశముందని రాజకీయ వర్గాలు విశ్లేషిస్తున్నాయి.

#Telangana#DistrictReorganisation#AdministrativeReforms#GovernanceSimplification#TelanganaGovernment#RevanthReddy
#RevenueDepartment#DistrictBoundaries#AdministrativeChanges#PublicAdministration#GovernmentDecision#TelanganaPolitics