ఏపీ ప్రజలకు డిజిటల్ గిఫ్ట్.. సహకార బ్యాంకుల్లో యూపీఐ సేవలు

ఆంధ్రప్రదేశ్‌లో సహకార బ్యాంకుల్లో యూపీఐ సేవలు ప్రారంభమయ్యాయి. ఇప్పటివరకు వాణిజ్య బ్యాంకుల్లోనే ఉన్న యూపీఐ సేవలు ఇప్పుడు జిల్లా సహకార కేంద్ర బ్యాంకుల్లో కూడా అందుబాటులో ఉన్నాయి.

ప్రయోగాత్మకంగా పశ్చిమగోదావరి జిల్లాలో ఈ సేవలు మొదలైనాయి. రైతులు సహా సహకార బ్యాంకు ఖాతాదారులు దీనిపై సంతోషం వ్యక్తం చేశారు.

రిపబ్లిక్ డే సందర్భంగా పశ్చిమగోదావరి జిల్లాలోని సహకార బ్యాంకుల్లో యూపీఐ సేవలను అధికారికంగా ప్రారంభించారు. దీని ద్వారా రైతులు కూడా ఇకపై క్యూఆర్ కోడ్ స్కాన్ చేసి చెల్లింపులు చేయడం, ఫోన్‌పే, గూగుల్‌పే వంటి డిజిటల్ పేమెంట్ యాప్‌లను వినియోగించే అవకాశం లభించింది.

ఇంతకాలం సహకార బ్యాంకుల్లో ఖాతాలు ఉన్న రైతులు పంటల విక్రయాలు, ఇతర లావాదేవీల కోసం వాణిజ్య బ్యాంకులను ఆశ్రయించాల్సిన పరిస్థితి ఉండేది. ఈ అసౌకర్యానికి చెక్ పెడుతూ, సహకార బ్యాంకుల్లోనే యూపీఐ సేవలు అందుబాటులోకి తీసుకురావాలని రాష్ట్ర ప్రభుత్వం నిర్ణయించింది.

ఆప్కాబ్ ఛైర్మన్ గన్ని వీరాంజనేయులు చొరవతో ఈ ప్రణాళిక కార్యరూపం దాల్చింది. ముందుగా తన స్వస్థలం అయిన ఉమ్మడి పశ్చిమగోదావరి జిల్లాలో ప్రయోగాత్మకంగా అమలు చేసి, త్వరలో రాష్ట్రవ్యాప్తంగా విస్తరించాలనే లక్ష్యంతో ప్రభుత్వం అడుగులు వేస్తోంది.

ప్రభుత్వం ఇప్పటికే సహకార సంఘాలు, బ్యాంకుల్లో కంప్యూటరీకరణను పూర్తిస్థాయిలో అమలు చేసింది. దీని వల్ల పారదర్శకత పెరిగింది. ఈ డిజిటలైజేషన్ వల్ల నగదు లేని లావాదేవీలు సులభం అయ్యాయి. ఇప్పుడు సహకార బ్యాంకు ఖాతాదారులు బ్రాంచ్‌కు వెళ్లాల్సిన అవసరం లేదు. వారు తమ మొబైల్ ఫోన్ ద్వారా ఎప్పుడైనా, ఎక్కడి నుంచైనా లావాదేవీలు చేయవచ్చు.

ప్రభుత్వం త్వరలో రాష్ట్రంలోని అన్ని సహకార బ్యాంకుల్లోనూ యూపీఐ సేవలను ప్రవేశపెట్టేందుకు సన్నాహాలు చేస్తోంది. ఇది లక్షలాది రైతులను డిజిటల్ చెల్లింపుల వ్యవస్థలోకి తీసుకురావడమే కాకుండా, వ్యవసాయ రంగంలోని ఆర్థిక లావాదేవీలను మరింత వేగవంతంగా, సులభంగా మార్చనుందని అధికారులు చెబుతున్నారు.

మొత్తంగా సహకార బ్యాంకుల్లో యూపీఐ సేవల ప్రారంభం రైతులకు డిజిటల్ సాధికారతను అందించే కీలక అడుగుగా మారింది.

#UPIServices#CooperativeBanks#APCooperativeBanks#DigitalPayments#CashlessTransactions#UPIForFarmers#FarmerEmpowerment
#DigitalBanking#FinancialInclusion#APGovernment#DCCBBanks#UPIRollout#DigitalIndia#RuralBanking#AgriFinance
#TechForFarmers#CashlessEconomy#AndhraPradeshNews