చివరి హెచ్చరిక: చిన్నారుల అశ్లీల వీడియోలు చూస్తే నిఘా.. ఎవరు వాడుతున్నారు అనేది తెలిసిపోతుంది!

చిన్నారులపై జరుగుతున్న అశ్లీల దాడులను పూర్తిగా అరికట్టే దిశగా పోలీసు యంత్రాంగం నిఘాను మరింత కఠినతరం చేసింది. బాలల అశ్లీల వీడియోలను చూడటం, డౌన్‌లోడ్ చేయడం లేదా ఇతరులకు షేర్ చేయడం అన్నీ చట్టరీత్యా నేరాలేనని సుప్రీంకోర్టు ఇప్పటికే స్పష్టంగా ప్రకటించింది.

ఇంటర్నెట్‌లో ఇలాంటి కంటెంట్ కోసం వెతికిన క్షణంలోనే అత్యాధునిక సైబర్ టెక్నాలజీ ద్వారా ఐపీ అడ్రస్, మొబైల్ నంబర్, ఈమెయిల్ వివరాలు గుర్తించి నిందితులను ట్రాక్ చేసే వ్యవస్థ ప్రస్తుతం పూర్తిస్థాయిలో అమలులో ఉంది.

హైదరాబాద్ సైబర్ క్రైమ్ పోలీసులు విశాఖపట్నంకు చెందిన యూట్యూబ్ ఛానల్ నిర్వాహకుడిని అరెస్ట్ చేశారు. ఇద్దరు బాలికలకు సంబంధించిన అశ్లీల కంటెంట్‌ను ప్రసారం చేసినందుకు పోలీసులు అతడిని అరెస్ట్ చేశారు. వీడియోలు తయారు చేసిన వారు మాత్రమే కాదు, వాటిని డౌన్‌లోడ్ చేసినా లేదా షేర్ చేసినా చట్టం ప్రకారం అదే తప్పుగా పరిగణిస్తారని పోలీసులు హెచ్చరిస్తున్నారు.

టెలిగ్రామ్, స్నాప్‌చాట్ వంటి యాప్‌ల ద్వారా వీడియోలు పంచుకుంటే దొరకమని భావించడం పూర్తిగా అపోహ మాత్రమే. నేషనల్ సెంటర్ ఫర్ మిస్సింగ్ అండ్ ఎక్స్‌ప్లాయిటెడ్ చిల్డ్రన్ పోర్టల్ ద్వారా దేశవ్యాప్తంగా పోలీసులు నిఘా పెడుతున్నారు.

ఈ తరహా కేసుల్లో ఇరుక్కుంటే ఉద్యోగ అవకాశాలు కోల్పోవడమే కాకుండా, విదేశాలకు వెళ్లే వీసా ప్రక్రియలోనూ తీవ్ర ఆటంకాలు ఎదురవుతాయి. నిజామాబాద్ జిల్లాలో గత ఏడాది కాలంలోనే దాదాపు 30 మందిపై ఇలాంటి కేసులు నమోదవడం పరిస్థితి తీవ్రతను తెలియజేస్తోంది.

తల్లిదండ్రులు తమ పిల్లల చేతికి స్మార్ట్ ఫోన్లు ఇచ్చే ముందు వారు ఏ కంటెంట్ చూస్తున్నారో పర్యవేక్షించాల్సిన బాధ్యత తప్పనిసరి. ఇంటర్నెట్ కనెక్షన్‌లో అశ్లీల వెబ్‌సైట్లు రాకుండా సెక్యూరిటీ సెట్టింగ్స్ మార్చుకోవాలని సైబరాబాద్ పోలీసులు సూచిస్తున్నారు. చిన్నారుల భద్రతే లక్ష్యంగా చైల్డ్ పోర్నోగ్రఫీపై ఎలాంటి రాజీ ఉండదని పోలీసులు స్పష్టం చేస్తున్నారు.

#ChildSafety#StopChildPornography#CyberCrime#HyderabadPolice#CyberCrimeAlert#ChildProtection#OnlineSafety#IPTracking
#CSAM#DigitalCrime#PoliceWarning#ParentsAlert