ఇల్లు లేనివారికి గుడ్ న్యూస్.. హైదరాబాద్‌లో 2BHK ఫ్లాట్ కేవలం రూ.19 లక్షలకే

తెలంగాణలో సొంతింటి కలను నిజం చేసేందుకు ప్రభుత్వం మరో ముందడుగు వేసింది. తెలంగాణ రాజీవ్ స్వగృహ కార్పొరేషన్ పరిధిలో హైదరాబాద్‌లోని రెడీ-టు-మూవ్ ఫ్లాట్ల విక్రయానికి నోటిఫికేషన్ వచ్చింది. మొత్తం 289 ఫ్లాట్లను ఆన్‌లైన్ లాటరీ ద్వారా ఇస్తారు.

ఈ ఫ్లాట్లు పోచారం, బండ్లగూడ, మేడ్చల్–మల్కాజ్‌గిరి వంటి వేగంగా అభివృద్ధి చెందుతున్న ప్రాంతాల్లో అందుబాటులో ఉన్నాయి. 1BHK, 2BHK విభాగాల్లో ఫ్లాట్లు ఉండగా, మధ్యతరగతి కుటుంబాలకు అందుబాటులో ఉండేలా ధరలను నిర్ణయించారు. సింగిల్ బెడ్రూమ్ ఫ్లాట్ల ధరలు రూ.13 లక్షల నుంచి ప్రారంభం కాగా, డబుల్ బెడ్రూమ్ ఫ్లాట్ల ధరను రూ.19 లక్షలుగా ఖరారు చేశారు.

ఫ్లాట్ల కేటాయింపు ప్రక్రియ పారదర్శకంగా ఉంటుంది. దరఖాస్తు చేసుకోవాలంటే జనవరి 31 లోపు టోకెన్ అడ్వాన్స్ చెల్లించాలి. ఫిబ్రవరి 4, 5 తేదీల్లో లైవ్ లాటరీ డ్రా నిర్వహిస్తారు. ఈ కార్యక్రమాన్ని యూట్యూబ్ ద్వారా ప్రత్యక్ష ప్రసారం చేస్తారు. లాటరీలో ఎంపిక కానివారికి టోకెన్ అడ్వాన్స్ మొత్తాన్ని పూర్తిగా తిరిగి ఇస్తామని అధికారులు చెప్పారు.

ఈ పథకానికి అర్హత పొందాలంటే దరఖాస్తుదారుడికి గ్రేటర్ హైదరాబాద్ మునిసిపల్ కార్పొరేషన్ పరిధిలో సొంత ఇల్లు లేదా ప్లాట్ ఉండకూడదు. ఒక్క కుటుంబం నుంచి ఒక్క దరఖాస్తు మాత్రమే చేయాలి. ఫ్లాట్ కేటాయించిన తేదీ నుంచి ఐదేళ్ల పాటు ఆస్తి బదిలీకి లాక్-ఇన్ పీరియడ్ నిబంధన ఉంటుంది.

నగరంలోని ఐటీ కారిడార్, ORR, మెట్రో మార్గాలు, విద్యాసంస్థలు, ఆసుపత్రులకు సమీపంలో ఈ ఫ్లాట్లు ఉండటంతో వీటిపై మంచి ఆసక్తి నెలకొంది. పెరుగుతున్న రియల్ ఎస్టేట్ ధరల మధ్య ప్రభుత్వ విశ్వసనీయతతో సొంతింటి అవకాశం అందించడం ఈ పథకానికి ప్రధాన ఆకర్షణగా నిలుస్తోంది. సొంత గృహం కోసం ఎదురుచూస్తున్న వారికి ఇది నిజంగా బంగారు అవకాశమనే చెప్పాలి.

#TGRSCL#RajivSwagruha#HyderabadFlats#OwnHouseDream#TelanganaHousing#ReadyToMoveFlats#AffordableHomes#GHMC
#SwagruhaFlats#TelanganaGovernment