బిగ్ బాస్ 9 తెలుగు: 68వ రోజు – ఎమోషనల్ జర్నీ!

బాలల దినోత్సవం సందర్భంగా, బిగ్ బాస్ హౌస్‌మేట్స్‌ను వారి చిన్ననాటి జ్ఞాపకాలలోకి తీసుకెళ్లారు. బిగ్ బాస్ పంపిన చిన్ననాటి ఫోటోలు, వాటి వెనుక ఉన్న భావోద్వేగాలను పంచుకుంటూ ఇంటి సభ్యులు కన్నీరు పెట్టుకున్నారు.

ఎపిసోడ్ ప్రారంభంలోనే తనూజ, కళ్యాణ్‌ల మధ్య పెద్ద వాగ్వాదం జరిగింది. తన చెల్లెలి పెళ్లి గురించి, ఆ రోజులు మళ్లీ తిరిగి రావు అనే బాధతో గార్డెన్ ఏరియాలో కన్నీళ్లు పెట్టుకున్న తనూజను చూసి, కళ్యాణ్ “ఏయ్! ఏడవకు తనూజ, కూర్చో నువ్వు నడిస్తే ఇంకా ఎక్కువ ఏడుస్తావు” అంటూ ఆపడానికి ప్రయత్నించాడు.

కళ్యాణ్ మాటిమాటికీ అడ్డుకోవడంతో కోపం తెచ్చుకున్న తనూజ, గాఢమైన భావోద్వేగానికి లోనైంది:

“నువ్వు ఒక కొశ్చన్ రెయిజ్ చేసినప్పుడు నన్ను ఆన్సర్ చేయడానికి ఇవ్వు… నువ్వు ఆపమనడం కూడా తప్పేనా… ప్లీజ్ నీలో ఉన్న వరస్ట్ పార్ట్ అది. నువ్వు ఏదైనా ఒక కొశ్చన్ అడిగినప్పుడు దానికి సమాధానమైనా చెప్పనివ్వు. నేను ఆలోచిస్తానా, నేను ఏడుస్తానా, నేను చస్తానా… నీకు అనవసరం అది! వదిలెయ్ లేకపోతే నన్ను!”

దీంతో కళ్యాణ్, తాను ఏడుపు ఆపమన్నానని మాత్రమే సంజాయిషీ ఇచ్చుకునే ప్రయత్నం చేశాడు.

తరువాత, కళ్యాణ్ తన చిన్ననాటి జ్ఞాపకాలను పంచుకున్నప్పుడు అందరి హృదయాలు బరువెక్కాయి.

• కృష్ణుడు వేషం వేసిన తన చిన్నప్పటి ఫోటోను చూసి, తాను ఐదో తరగతిలో హాస్టల్‌లో చేరినప్పటి సంగతులను గుర్తుచేసుకున్నాడు.

• తాను పుట్టడం వల్ల తండ్రికి కలిసి వచ్చిందని అందరూ చెప్పేవారని, కానీ వ్యాపారంలో నష్టాలు రావడంతో చిన్నప్పుడే తనను అత్తయ్య ఇంటికి పంపించినట్లు తెలిపాడు.

• “డాడీతో, మమ్మీతో తిరిగింది గుర్తులేదు… అమ్మ, డాడీ పక్కన లేరు అనేది చాలా బాధగా ఉండేది… నా 23 ఏళ్లలో నేను 4 ఏళ్లు మాత్రమే వాళ్లతో ఉన్నాను,” అంటూ గుక్కపట్టి ఏడ్చాడు. హాస్టల్‌లో ప్రతి ఆదివారం ఫోన్ కోసం ఎదురుచూసినా ఒక్కసారి కూడా కాల్ వచ్చేది కాదంటూ తన బాధను వ్యక్తం చేశాడు.

ఇమ్మానుయేల్ తన అన్నయ్య డేనియల్‌తో ఉన్న చిన్నప్పటి ఫోటోను చూసి తన బాల్యాన్ని తలచుకున్నాడు.

• తాను కడుపులో ఉన్నప్పుడు తల్లికి తిండి లేకపోవడంతో మట్టి తినేదని, తమకు అప్పట్లో పాక ఇల్లు ఉండేదని ఎమోషనల్ అయ్యాడు.

• “మా అమ్మమ్మ మాత్రం పట్టుబట్టి ఉంచింది, అబ్బాయి పుడతాడు, వాడి వల్ల మీ లైఫ్ మారుతుందని చెప్పింది,” అంటూ తన జననం వెనుక ఉన్న కష్టాన్ని వివరించాడు.

• తాను, తన అన్నయ్య చిన్నప్పటి నుంచి పొలం పనులు, సిమెంట్ పని, క్యాటరింగ్ వంటి ఎన్నో పనులు చేసి డిగ్రీ వరకు చదువుకున్నామని తెలిపాడు.

• తన అన్నయ్యే తన హీరో అని, 20 మూటలు మోయాల్సి వస్తే తనను ఐదే మోయనిచ్చి, తను 15 మోసేవాడని గుర్తుచేసుకున్నాడు.

• అయితే, గత మూడేళ్లుగా తన అన్నయ్యతో సరిగా మాటల్లేవని, తను ఇండస్ట్రీలో సక్సెస్ అవ్వడంతో, తన అన్నయ్య ఇంకా సక్సెస్ కాలేదని అందరూ చెప్పడంతో ఫీలై దూరమయ్యాడని కన్నీళ్లు పెట్టుకున్నాడు. “వీడు కన్ఫార్మ్‌గా ఒక డైరెక్టర్ అవుతాడు” అంటూ ఆశాభావం వ్యక్తం చేశాడు.

తనూజ తన చిన్ననాటి ఫోటోను చూస్తూ తన తల్లి గురించి మాట్లాడింది.

• తాము ముగ్గురు ఆడపిల్లలం కావడంతో, తండ్రి పెళ్లిళ్లు చేయాలని భయపడి పెద్దగా చదివించొద్దన్నారని తెలిపింది.

• “మా అమ్మ మా కోసం నాన్నకి దూరంగా ఉన్నా ఫర్లేదని మా చదువు కోసం హైదరాబాద్ తీసుకొని వచ్చేసింది,” అంటూ తన తల్లిని తన లైఫ్‌లో బెస్ట్ ‘సూపర్ హీరో’గా అభివర్ణించింది.