అరగంటలో ఉచిత దర్శనం అంటారా..? తిరుమల ప్రచారంపై టీటీడీ క్లారిటీ

తిరుమల శ్రీవారి దర్శనానికి సంబంధించిన సోషల్ మీడియాలో జారీ అయిన వార్తలపై టీటీడీ స్పష్టత ఇచ్చింది. వృద్ధుల కోసం తిరుమలలో కొత్త ఉచిత దర్శన పథకం ప్రారంభమైందనే వార్తలు పూర్తిగా అవాస్తవమని టీటీడీ ఖండించింది. ఇలాంటి తప్పుడు సమాచారం గురించి భక్తులకు హెచ్చరిక జారీ చేసింది.

తిరుమల శ్రీవారిని దర్శించుకునేందుకు టీటీడీ పలు టికెట్లను అందుబాటులో ఉంచుతోంది. ఆన్‌లైన్ దర్శన్ కోటా, శ్రీవాణి ట్రస్ట్ టికెట్లు, ఎస్‌ఎస్‌డీ దర్శనం, ఆర్జిత సేవలతో పాటు వృద్ధులు, దివ్యాంగుల కోసం ప్రతి నెలా ప్రత్యేక కోటాను విడుదల చేస్తోంది. అయితే, వృద్ధులకు ఉచిత దర్శన పథకం ప్రారంభించారంటూ సోషల్ మీడియా మీద మెసేజ్ విస్తృతంగా షేర్ అవుతోంది. ఇందులో సీఎం చంద్రబాబు నాయుడు ఈ పథకాన్ని ప్రారంభించడం, 65 సంవత్సరాల పైబడిన వృద్ధులు రోజుకు రెండుసార్లు ఉచితంగా దర్శనం చేసుకోవడం, క్యూ లైన్లో 30 నిమిషాల్లో దర్శనం పూర్తవడం గురించి ప్రస్తావన ఉంది. అలాగే, దర్శనానంతరం ఉచిత భోజనం, పాలు ఇస్తామని, హెల్ప్‌డెస్క్ నంబర్ వంటి మొబైల్ నంబర్‌ను ప్రచారం చేస్తున్నారు.

ఈ ప్రచారం పూర్తిగా ఫేక్ న్యూస్ అని టీటీడీ స్పష్టం చేసింది. వృద్ధుల కోసం ఎలాంటి కొత్త ఉచిత దర్శన పథకం లేదని వెల్లడించింది. తిరుమల దర్శనాల విషయంలో భక్తులు కేవలం టీటీడీ అధికారిక వెబ్‌సైట్, మొబైల్ యాప్, ధృవీకరించిన సోషల్ మీడియా ఖాతాల ద్వారా విడుదలైన ప్రకటనలనే నమ్మాలని సూచించింది. తప్పుదోవ పట్టించే సమాచారం షేర్ చేయవద్దని కోరింది.

ఈ సందర్భంగా, టీటీడీ ఈవో అనిల్ కుమార్ సింఘాల్ హైదరాబాద్‌లోని టీటీడీ ఆలయాలను పరిశీలించారు. జూబ్లీహిల్స్‌లోని శ్రీ ఎస్వీ ఆలయాన్ని సందర్శించి, అక్కడి పార్కింగ్ సమస్యపై స్థానిక ప్రతినిధులతో చర్చించారు. తిరుమల తరహాలో భక్తులకు శుభ్రంగా, రుచికరంగా అన్నప్రసాదం అందించే చర్యలు తీసుకోవాలని అధికారులకు సూచించారు. అవసరమైతే వంట సిబ్బందికి ప్రత్యేక శిక్షణ ఇస్తామని తెలియజేశారు. ఆలయంలో భక్తులకు అందించే సౌకర్యాలపై మాట్లాడగా, భక్తులు సంతృప్తి వ్యక్తం చేశారని తెలిపారు. ఆయన ముందుగా హిమాయత్‌నగర్‌లోని ఎస్వీ ఆలయాన్ని కూడా పరిశీలించారు. నూతన సంవత్సరాన్ని దృష్టిలో ఉంచుకుని, క్యాలెండర్లు, డైరీలు తగినంతగా అందుబాటులో ఉంచాలని అధికారులకు ఆదేశించారు.

#TTD#Tirumala#TirupatiBalaji#TTDClarification#FakeNewsAlert#TTDOfficial#SeniorCitizenDarshan#TirumalaUpdates
#DevoteeAlert#TTDFakeNews#SriVenkateswara#TempleNews