రూ.70 వేలు జీతం తీసుకునే టీచర్‌కు ‘ELEVEN’ స్పెల్లింగ్ రాదట!

ఛత్తీస్గఢ్ రాష్ట్రంలోని బలరాంపూర్ జిల్లాలోని ప్రభుత్వ పాఠశాలలో పని చేస్తున్న ఒక టీచర్ పనితీరు ప్రస్తుతం తీవ్ర విమర్శలకు లోనవుతోంది. తాజాగా నిర్వహించిన అధికారుల తనిఖీలో, ఆ టీచర్‌కు సాధారణ స్పెల్లింగులు కూడా రాకపోవడం కలకలం రేపుతోంది. ప్రత్యేకంగా ‘ELEVEN’ అనే పదాన్ని రాయమని అడిగినప్పటికీ, ఆయన తప్పుగా రాయడం అధికారులు వీడియోలో రికార్డ్ చేశారు. ఈ ఘటనపై సోషల్ మీడియాలో తీవ్ర విమర్శలు వ్యక్తమవుతున్నాయి.

వీడియోను ఓ నెటిజన్ ట్విట్టర్ (X)లో షేర్ చేస్తూ, “రూ.70 వేలు జీతం తీసుకుంటున్న టీచర్‌కి స్పెల్లింగ్ కూడా రాకపోతే, అబ్బా, పిల్లల భవిష్యత్తు ఏంటిరా బాబోయ్?” అంటూ ఆగ్రహం వ్యక్తం చేశారు. ఈ వీడియో కొద్దిసేపట్లోనే వైరల్ అయ్యింది. వేలాది మంది నెటిజన్లు దీన్ని షేర్ చేస్తూ ప్రభుత్వ విద్యా వ్యవస్థ తీరుపై ప్రశ్నలు వేస్తున్నారు. “ఈ స్థాయిలో అర్హతలేని టీచర్లు పిల్లలకు ఏం నేర్పగలరు?” అని వారు ప్రశ్నిస్తున్నారు.

ఇక విద్యాశాఖ అధికారులు ఈ ఘటనపై స్పందిస్తూ, దీనిపై సీరియస్‌గా విచారణ జరుగుతోందని తెలిపారు. బలరాంపూర్ DEO (District Education Officer) ఆ టీచర్‌ను తాత్కాలికంగా సస్పెండ్ చేయడం లేదా విధుల్లోనుంచి తప్పించేందుకు చర్యలు తీసుకుంటున్నట్లు సమాచారం. దేశంలో విద్యా నాణ్యత గురించి చర్చలు జరుగుతున్న తరుణంలో ఇలాంటి ఉదంతాలు పాలనలో వైఫల్యాన్ని ఎత్తిచూపుతున్నాయి.