Telangana
టీఆర్ఎస్ నుండి కాంగ్రెస్‌కు వెళ్లిన ఎమ్మెల్యేలు – స్పీకర్‌కు సుప్రీంకోర్టు ధిక్కరణ నోటీసులు
తెలంగాణలో పార్టీ మారిన ఎమ్మెల్యేల కేసు మరోసారి వేడెక్కింది. బీఆర్ఎస్ నుండి కాంగ్రెస్‌కు వెళ్లిన ఎమ్మెల్యేలపై పెండింగ్‌లో ఉన్న అనర్హత పిటిషన్లను పరిష్కరించడంలో జాప్యం జరగడంతో సుప్రీంకోర్టు తీవ్ర అసహనం వ్యక్తం చేసింది. ఇదే కారణంగా తెలంగాణ అసెంబ్లీ స్పీకర్ గడ్డం ప్రసాద్ కుమార్‌కు కోర్టు ధిక్కరణ నోటీసులు జారీ చేసి, ఆలస్యంపై స్పష్టమైన వివరణ ఇవ్వాలని ఆదేశించింది.
విచారణ సందర్భంగా ధర్మాసనం స్పీకర్ వైఖరిపై తీవ్ర అసంతృప్తి వ్యక్తం చేస్తూ, “ఎమ్మెల్యేల అనర్హతపై మీరు నిర్ణయం తీసుకుంటారా? లేక మేమే తీసుకోవాలా?” అని సూటిగా ప్రశ్నించింది. ఇప్పటికే మూడు నెలల గడువు ఇచ్చినా ఎలాంటి చర్యలు తీసుకోకపోవడంతో సుప్రీంకోర్టు ఆగ్రహం వ్యక్తం చేసి, నాలుగు వారాల్లోగా విచారణ పూర్తి చేసి తుది నిర్ణయం ఇవ్వాలని స్పష్టమైన ఆదేశాలు జారీ చేసింది.
ఇక స్పీకర్ తరపున న్యాయవాదులు పిటిషన్ల విచారణకు ఎనిమిది వారాల సమయం కావాలని కోరినప్పటికీ, సుప్రీంకోర్టు దీనిని తిరస్కరించింది. కేవలం నాలుగు వారాల గడువు మాత్రమే ఇస్తున్నట్లు పేర్కొని, విచారణ పూర్తయిన తర్వాత నివేదికను కోర్టుకు సమర్పించాలని ఆదేశించింది. దీంతో తెలంగాణలో రాజకీయ ఉష్ణోగ్రతలు పెరిగాయి.
ఈ ఫిరాయింపు కేసు 2023 అసెంబ్లీ ఎన్నికల తరువాత ప్రారంభమైంది. బీఆర్ఎస్ నుంచి గెలిచిన పది మంది ఎమ్మెల్యేలు అధికార కాంగ్రెస్ పార్టీలో చేరడంతో, బీఆర్ఎస్ తరఫున కేటీఆర్ సహా పలువురు నాయకులు అనర్హత పిటిషన్లు దాఖలు చేశారు. కానీ ఆ పిటిషన్లపై స్పీకర్ కార్యాలయం చర్యలు తీసుకోకపోవడంతో ఫిర్యాదుదారులు సుప్రీంకోర్టును ఆశ్రయించడంతో కేసు మరోసారి హాట్‌టాపిక్‌గా మారింది.
