‘అఖండ 2: బాలయ్య విశ్వరూపం!

నటసింహం నందమూరి బాలకృష్ణ, దర్శకుడు బోయపాటి శ్రీను కలయికలో రాబోతున్న ‘అఖండ 2’ చిత్రంపై అంచనాలు భారీగా పెరిగాయి. ‘సింహా’, ‘లెజెండ్’, ‘అఖండ’ వంటి బ్లాక్‌బస్టర్ల తర్వాత ఈ హ్యాట్రిక్ కాంబినేషన్ నుంచి వస్తున్న సినిమా కావడంతో అభిమానులు ఆసక్తిగా ఎదురుచూస్తున్నారు.

శివతాండవం చేస్తూ ఉన్న బాలకృష్ణ ఫస్ట్ లుక్ పోస్టర్, పవర్‌ఫుల్ టీజర్ ఇప్పటికే సినిమా క్రేజ్‌ను అమాంతం పెంచేశాయి. తాజాగా, చిత్ర యూనిట్ ముంబయిలో ఒక గ్రాండ్ ఈవెంట్‌ను నిర్వహించి, ‘అఖండ 2’ నుంచి మొదటి సింగిల్‌ను విడుదల చేసింది.

 తమన్ సంగీతం అందించిన ఈ పాట మాస్ బీట్‌తో, అఖండ పాత్ర యొక్క విశ్వరూపాన్ని తెలియజేసేలా ఉందని అభిమానులు హర్షం వ్యక్తం చేస్తున్నారు.

‘అఖండ’తో ఈ కాంబినేషన్‌కు జాతీయ స్థాయిలో గుర్తింపు రావడంతో, మేకర్స్ ‘అఖండ 2’ ప్రమోషన్లను కూడా పాన్ ఇండియా స్థాయిలో ప్లాన్ చేశారు. అందులో భాగంగానే ముంబయిలో ఈ ఫస్ట్ సింగిల్ విడుదల కార్యక్రమాన్ని నిర్వహించారు.

• బాలయ్య నట విశ్వరూపానికి, తమన్ బ్యాక్‌గ్రౌండ్ స్కోర్‌కు మరింత జోష్‌నిచ్చింది. ఈ పాటలో మేకింగ్ విజువల్స్ కూడా జోడించడంతో ప్రేక్షకుల్లో సినిమాపై అంచనాలు మరింత పెరిగాయి.

తెలుగు సినీ పరిశ్రమలో బాలకృష్ణకు ఉన్న మాస్ ఇమేజ్ ప్రత్యేకమైనది. ఆయన పవర్‌ఫుల్ స్క్రీన్ ప్రెజెన్స్, ప్రత్యేకమైన డైలాగ్ డెలివరీకి, బోయపాటి శ్రీను మార్క్ మాస్ యాక్షన్ ట్రీట్‌మెంట్ తోడవడంతో వీరి కలయిక అంటేనే బాక్సాఫీస్ వద్ద తుఫాను సృష్టించడం ఖాయంగా మారింది.

2021లో వచ్చిన ‘అఖండ’ అఖండమైన విజయాన్ని సాధించి, బాలకృష్ణ మాస్ అవతారాన్ని శిఖరానికి చేర్చింది. ఆ విజయాన్ని మించి ‘అఖండ 2 భారీ హిట్ సాధిస్తుందని, బాలయ్య ఈసారి రుద్రావతారంలో కనిపించబోతున్నారని సినీ వర్గాల్లో టాక్ వినిపిస్తోంది. ఆధ్యాత్మికత, సనాతన ధర్మం వంటి అంశాల కలయికతో రూపొందుతున్న ఈ చిత్రం బాలయ్య-బోయపాటి కాంబోకు నాలుగో విజయాన్ని అందిస్తుందని అభిమానులు బలంగా నమ్ముతున్నారు.