తెలంగాణ డీఎస్సీలో ఆంధ్రప్రదేశ్‌ యువకుడి సత్తా.. టాప్ ర్యాంక్, పోస్ట్ ఖాయం!

తెలంగాణ డీఎస్సీ ఫలితాల్లో ఏపీ యువకుడు సత్తా చాటారు. విజయనగరంలోని భవానీనగర్‌కు చెందిన కేవీఎస్ శ్రీరామ్ బీటెక్ పూర్తి చేశారు.. ప్రభుత్వ ఉద్యోగం సాధించాలని లక్ష్యంగా పెట్టుకున్నారు. అది కూడా ఉపాధ్యాయ వృత్తిలోకి వెళ్లాలని నిర్ణయించుకున్నారు. అయితే ప్రభుత్వ ఉద్యోగాలకు చదువుతున్న క్రమంలో.. సచివాలయాల ఉద్యోగాలకు నోటిఫికేషన్ వచ్చింది. ఆ పరీక్ష రాసి.. సచివాలయం సంక్షేమ సహాయకునిగా ఎంపికయ్యారు. ఆ తర్వాత కొద్ది నెలలకే ఆ ఉద్యోగం వదులుకుని డిఎస్సీ కోసం సిద్ధమయ్యారు.. కష్టపడి చదివారు

ఈ క్రమంలో తెలంగాణలో నిర్వహించిన డీఎస్సీ రాసిన కేవీఎన్ శ్రీరామ్‌ గణితంలో (స్కూల్‌ అసిస్టెంట్‌) మొదటి ర్యాంకు సాధించారు. ఆయన 100కు 84.83 మార్కులు వచ్చాయి. అంతేకాదు శ్రీరామ్ 2022, 2023 తెలంగాణ టెట్‌లోనూ ప్రతిభ కనబరిచారు.. రెండు సార్లు వరుసగా మూడో స్థానంలో నిలిచారు. అలాగే 2022లో నిర్వహించిన ఏపీ టెట్‌లో 150కి 129 మార్కులు సాధించారు. శ్రీరామ్ ఆంధ్రప్రదేశ్‌లో డీఎస్సీకి కూడా సిద్ధమవుతున్నారు. శ్రీరామ్ తెలంగాణ డీఎస్సీలో పోస్ట్ రావడం ఖాయం అంటున్నారు.

మరోవైపు తెలంగాణ డీఎస్సీ జనరల్‌ ర్యాంకింగ్‌ లిస్ట్‌ మేరకు జిల్లాల్లో 1:3 నిష్పత్తిలో ఎంపికైన వారికి ధ్రువపత్రాల పరిశీలన నేటి నుంచి ప్రారంభమవుతోంది. ఈ నెల 1 నుంచి 5వ తేదీ వరకు పరిశీలన జరుగుతుందని అధికారులు తెలిపారు. 1 నుంచి 5 వరకు ఉదయం 10 నుంచి సాయంత్రం 5 గంటల వరకు ఈ ప్రక్రియ జరుగుతుందని చెప్పారు. జిల్లాలు, రోస్టర్‌ పాయింట్ల ఆధారంగా 1:3 నిష్పత్తిలో అర్హులైన అభ్యర్థులకు ఎస్‌ఎంఎస్, ఈ-మెయిల్‌ ద్వారా సమాచారం అందిస్తామన్నారు. అలాగే ఈ జాబితాలు డీఈవోల వెబ్‌సైట్లలోనూ అందుబాటులో ఉంటాయన్నారు. ధ్రువపత్రాల పరిశీలనకు వచ్చే అభ్యర్థులు.. విద్యార్హతకు సంబంధించినసర్టిఫికేట్లు, టెట్, డీఎస్సీ, కుల, 1-7 తరగతుల స్టడీ సర్టిఫికెట్‌ (ఒరిజినల్‌)లతో పాటు రెండు సెట్ల జిరాక్స్‌‌లు తీసుకురావాలని అధికారులు సూచించారు. అంతేకాదు అభ్యర్థులు పాఠశాల విద్యాశాఖ వెబ్‌సైట్లో ఉంచిన ఫారం తీసుకురావాలి అన్నారు. త్వరలోనే అభ్యర్థులకు ధ్రువపత్రాల పరిశీలన పూర్తి చేసి పోస్టింగ్‌లు కూడా కేటాయించనున్నారు.