మద్రాస్ హైకోర్టు సంచలన తీర్పు.. హగ్‌లు, ముద్దులు నేరం కాదు..

మద్రాస్ హైకోర్టు మరోసారి సంచలన నిర్ణయం తీసుకుంది. ప్రేమలో ఉన్న వ్యక్తులు కౌగిలించుకోవడం, ముద్దులు పెట్టుకోవడం సర్వసాధారణమని, వీటిని లైంగిక నేరాలుగా పరిగణించడం తప్పని నిర్ణయానికి వచ్చింది. ఈ విషయంపై హైకోర్టు అభిప్రాయపడింది, ప్రేమలో ముద్దులు పెట్టుకోవడం లేదా కౌగిలించుకోవడం లైంగిక దాడి లేదా నేరంగా భావించి, వాటి ఆధారంగా వ్యక్తిని దోషిగా తీర్పునిచ్చే అవకాశం లేదని స్పష్టం చేసింది.

కాగా, ఒక యువతి తన ప్రేమికుడు తనను ముద్దుపెట్టుకొని కౌగిలించుకున్నాడని, ఈ చర్యల కారణంగా పోలీసులకు ఫిర్యాదు చేయడంతో, పోలీసులు యువకుడిపై కేసు నమోదు చేశారు. ఆ తరువాత, ఈ కేసు మద్రాస్ హైకోర్టులో విచారణకు వచ్చింది. చివరికి, కోర్టు ఈ అంశంపై కీలకమైన తీర్పును వెల్లడించింది.

ప్రేమలో ఉన్నప్పుడు హగ్ చేసుకోవడం, ముద్దులు పెట్టుకోవడం అనేది సాధారణమైన విషయమని మద్రాస్ హైకోర్టు మధురై బెంచ్ పేర్కొంది. దీనిని ఐపీసీ సెక్షన్ 354-A(1)(i) కింద నేరంగా పరిగణించడాన్ని వ్యతిరేకిస్తూ, ఈ చర్యలు నేరం కాదని తీర్పు ఇచ్చింది. 21 సంవత్సరాల యువకుడు పై 19 సంవత్సరాల యువతి ఫిర్యాదు చేస్తూ, 2022 నవంబరులో ఒక రాత్రి వారు కలుసుకున్నప్పుడు ఆ యువకుడు తనను ముద్దు పెట్టుకోవడం, హగ్ చేయడం జరిగాయని పేర్కొంది. అయితే, ఈ ఫిర్యాదును మద్రాస్ హైకోర్టు కొట్టివేసింది.

ఈ సందర్భంలో కోర్టు కొన్ని కీలక వ్యాఖ్యానాలు చేసింది. ప్రేమకు సంబంధించిన సంబంధాల్లో కొన్ని ప్రవర్తనలు నేరంగా పరిగణించవచ్చని మద్రాస్ హైకోర్టు స్పష్టం చేసింది. ఉదాహరణకు, ప్రేమలో ఉన్నప్పుడు పెళ్లి చేసుకుంటానని చెప్పి నమ్మించి, తర్వాత శారీరక సంబంధం పెట్టుకోవడం లేదా లైంగికంగా మోసం చేయడం వంటి చర్యలు చట్టప్రకారం నేరంగా భావించబడతాయని కోర్టు పేర్కొంది.

ప్రేమ సంబంధాలు ఒకరినొకరు స్వేచ్ఛగా, ఇష్టపూర్వకంగా కలిసినప్పుడు, అవి సహజమైనవి అని, ముఖ్యంగా టీనేజ్ ప్రేమలో హగ్‌లు, కిస్‌లు సాధారణమని కోర్టు వెల్లడించింది. అయితే, సంబంధాలు ఏకాభిప్రాయంగా మొదలయ్యాక, తరువాత వాటిలో వివాదాలు రాగానే విడిపోతే, ఈ తరహా సంబంధాలపై నేరాలు వేయడం సరైన దారి కాదని కోర్టు వ్యాఖ్యానించింది.