కథేంటంటే?(Devara Story) : ఆంధ్ర‌ప్ర‌దేశ్, త‌మిళ‌నాడు స‌రిహ‌ద్దులో ర‌త్న‌గిరి అనే ప్రాంతం ఉంటుంది. అక్కడే స‌ముద్రానికి ఆనుకుని ఉన్న ఓ కొండ‌పై నాలుగు ఊర్ల‌ను క‌లిపి ఎర్ర స‌ముద్రం అని పిలుస్తారు. ఆ పేరు వెన‌క బ్రిటీష్ కాలం నుంచే ఓ పెద్ద చ‌రిత్ర ఉంటుంది. ఆ నాలుగు ఊళ్ల ప్రజల అవ‌స‌రాల కోసం దేవ‌ర (ఎన్టీఆర్‌), భైర‌ (సైఫ్ అలీఖాన్‌) తమ అనుచ‌రుల‌తో క‌లిసి ఎర్ర స‌ముద్రంపై ప్ర‌యాణం చేసే నౌక‌లపై ఆధార‌ప‌డుతుంటారు.

అయితే ఆ నౌక‌ల్లో అక్ర‌మ ఆయుధాల్ని దిగుమ‌తి చేస్తుంటుంది మురుగ (ముర‌ళీశ‌ర్మ‌) గ్యాంగ్. అయితే ఇలా అక్రమంగా దిగుమతి చేసే ఆయుధాల వల్ల త‌మ‌కే ముప్పు కలిగిస్తుందని గ్ర‌హించిన దేవ‌ర‌ ఇక‌పై ఆ పనుల్ని చేయకూడ‌ద‌నే నిర్ణయిస్తాడు. చేప‌లు ప‌ట్ట‌డంపై దృష్టి పెడ‌దామ‌ని ఆదేశిస్తాడు.

కానీ భైర‌కు అది ఇష్టం ఉండదు. దీంతో ఈ ఇద్ద‌రి మ‌ధ్య అంతర్యుద్ధం ప్రారంభం అవుతుంది. దీంతో దేవ‌ర‌ను అడ్డు తొల‌గించి సంద్రాన్ని శాసించాల‌నుకుంటాడు భైర‌. కానీ దేవ‌ర మాత్రం అజ్ఞాతంలో ఉంటూ ప్రత్యర్థులను భ‌య‌పడేలా చేస్తుంటాడు.

మరి ఆ భ‌యం ఎన్ని త‌రాలు కొన‌సాగింది? దేవర ఎందుకు అజ్ఞాతంలో ఉన్నాడు? దేవ‌ర కోసం అతని కొడుకు వ‌ర (ఎన్టీఆర్‌) ఏం చేశాడు? వ‌ర‌ని ఇష్ట‌ప‌డిన తంగం (జాన్వీక‌పూర్‌) ఎవ‌రు? వంటి విషయాలు తెరపై చూడాల్సిందే.

ఎలా ఉందంటే?(Devara Review) – ‘దేవర’ కొసం ఒక కొత్త ప్ర‌పంచాన్ని ఆవిష్క‌రించారు. ఆ ప్రపంచం చుట్టూ భావోద్వేగాలు, గాఢ‌తతో కూడిన క‌థ‌ను చెప్పే ప్ర‌య‌త్నం చేశారు ద‌ర్శ‌కుడు కొర‌టాల శివ‌. ఎన్టీఆర్​ దీటైన పాత్ర‌ను ఎంచుకుని, దానిపై ప‌రిపూర్ణ‌మైన ప్ర‌భావం చూపించారు. పాన్ ఇండియా స్థాయికి త‌గ్గట్టుగా విస్తృత ప‌రిధి ఉన్న క‌థ ఇది. స‌ముద్రం నేప‌థ్యంలో సాగే కథ కావడంతో ప్రేక్ష‌కుల‌కు ఓ స‌రికొత్త అనుభూతిని ఇచ్చింది. బ్రిటిష్ కాలం నుంచి ఎర్ర స‌ముద్రానికి, అక్కడి ప్రజలకు ఉన్న చ‌రిత్ర‌, దానికి కాపలాగా ఉండే దేవ‌ర క‌థ‌ను సింగ‌ప్ప(ప్ర‌కాశ్‌రాజ్‌)తో చెప్పిస్తూ క‌థ‌ను అద్భుతంగా నడిపించారు. న‌డిపించిన తీరు ఆక‌ట్టుకుంటుంది.

ఎన్టీఆర్​ ఎంట్రీ సీన్​ ఎలివేష‌న్స్‌, స‌ముద్రం బ్యాక్​డ్రాప్​ గొప్ప థియేట్రిక‌ల్ అనుభూతిని పంచుతుంది. దేవ‌ర‌, భైర ఆ రెండు పాత్ర‌ల్ని అత్యంత శ‌క్తిమంతంగా తెర‌పై ఆవిష్క‌రించారు. ఇద్దరి మ‌ధ్య సాగే భీకర పోరాటం, సహా ఇతర స‌న్నివేశాలను అద్భుతంగా చూపించారు. ఫియ‌ర్ సాంగ్‌, యాక్షన్ సీన్స్​, ఇంటర్వెల్ సీన్స్​ మ‌రో స్థాయిలో ఉన్నాయి. మొత్తంగా ఫస్ట్​ హాఫ్​లో ఎర్ర స‌ముద్రం క‌థ‌, దేవ‌ర‌, భైర‌వ పాత్ర‌లు, యాక్షన్ సీన్స్​, సాంగ్స్​ ఇలా అన్ని సూపర్​గా ఉన్నాయి.

సెకండాఫ్​లో వ‌ర‌, తంగం పాత్ర‌ల సంద‌డి కనిపిస్తుంది. స‌ర‌దా స‌ర‌దాగా సాగే కొన్ని సన్నివేశాలు, ఆ త‌ర్వాత మ‌ళ్లీ దేవ‌ర పాత్ర‌ను చూపిస్తూ కథలో గాఢతను పెంచుతారు. ఫస్ట్​ హాఫ్​తో పోలిస్తే సెకండాఫ్​ కాస్త తక్కువే. క్లైమాక్స్​లో వచ్చే మ‌లుపు ఊహించిందే అయినా, దానికి కొన‌సాగింపుగా సాగే పోరాట ఘ‌ట్టాలు, స‌ముద్రంలో దేవర పాత్ర‌ను చూపించిన తీరు బాగా ఆకట్టుకున్నాయి. ఫైనల్​గా దేవ‌ర‌, భైర‌ పాత్ర‌ల ముగింపు ఏమిట‌నేది రెండో భాగం కోసం దాచి పెట్టారు.